Бирлашган Араб Амирликларидан бўлган паралимпиячи Абдулла Ҳайай Лондондаги машғулот чоғида бахтсиз ҳодиса туфайли ҳалок бўлди, деб хабар бермоқда Халқаро паралимпия қўмитаси матбуот хизмати. 36 ёшли найза улоқтирувчи Буюк Британия пойтахтида 14-23 июль кунлари бўлиб ўтадиган жаҳон чемпионатига тайёргарлик кўраётганди.
Daily Mail’нинг хабар беришича, Абдулланинг устига металл устун қулаган. Ҳодиса жойига етиб келган қутқарувчилар ҳеч нарса қила олишмади – Ҳайай ҳодиса жойида ҳаётдан кўз юмди.
«Барчамиз рўй берган ҳодисадан қайғудамиз. Бизнинг барча фикримиз ва дуоларимиз Абдулланинг оиласи, дўстлари ҳамда жамоадошлари билан бирга. Шунингдек, БАА миллий паралимпия қўмитасига ҳамдардлик изҳор этамиз. Биз бу даҳшатли фожиадан шокдамиз», - дея айтиб ўтди МПҚ раҳбари Филип Крэйвен.
Жаҳон чемпионатининг очилиш маросимида Ҳайай хотирасига бир дақиқалик сукут сақланади.
