Ўзбекистонда солиқ қонунчилиги бузилишининг топ-9 талиги 

Давлат солиқ қўмитаси матбуот-маркази июль ойининг биринчи ҳафтасида  солиқ органлари томонидан ўтказилган назорат чора-тадбирлари якунлари бўйича аниқланган ҳуқуқбузарликлар рўйхатини эълон қилди, деб хабар бермоқда Norma.uz.

Солиқ назорати натижаларига кўра, кўрсатилган даврда 4 150 ҳуқуқбузарлик ҳолати аниқланган.

96 нафар жисмоний шахс ва 1000 дан ортиқ тадбиркорлик субъектлари биринчи марта солиққа оид ҳуқуқбузарликлар содир этганлиги ҳамда аниқланган кундан бошлаб 30 кун ичида унинг оқибатларини бартараф этганликлари, шунингдек давлатга зарарни тўлиқ қоплаб берганликлари учун маъмурий жавобгарликдан озод этилди.

Амалдаги қонунчилик талабларини қўпол равишда бузган 2 993 нафар шахсга нисбатан  988,7 млн. сўм миқдорида маъмурий жарималар қўлланилди.

Қуйидагилар ҳуқуқбузарликлар орасида энг “оммабоплари” бўлди:

•  савдо ва хизмат кўрсатиш қоидаларини бузиш, шу жумладан харидорларга чек (квитанция, ҳисобварақ) бермасдан товарларни, маҳсулотларни (хизматлар) сотиш (хизматлар кўрсатиш); назорат-касса машиналарини қўллаш тартибига риоя қилмаслик; пул билан ҳисоб-китобларни амалга оширишда тўлов терминалларини қўллаш тартибига риоя қилмаслик; нархларни асоссиз ошириш;
•  бинолар, иншоотлар, турар жойларни нотариал тасдиқланган шартномасиз ижарага ёки текин фойдаланишга бериш;
•  уй-жойга бўлган мулкий ҳуқуқларни ўз вақтида расмийлаштирмаслик;
•  солиқ органларига даромадлар тўғрисидаги декларацияни ўз вақтида топширмаслик;
•  тадбиркорлик фаолиятини ноқонуний амалга ошириш;
•  автомобиль транспортида йўловчиларни ташиш бўйича фаолиятни лицензиясиз амалга ошириш;
•  солиқ органларига солиқ ҳисоботларини ўз вақтида топширмаслик;
•  муддати ўтган дебиторлик қарзи;
солиқлар ва бошқа мажбурий тўловларни тўлаш учун хизмат кўрсатувчи банкка ўз вақтида тўлов топшириқномасини тақдим этмаслик.