Disney компанияси Netflix билан ҳамкорликни тўхтатади

Американинг Disney кинокомпанияси Netflix стриминг платформасидан ўз фильмларини олиб, шахсий платформасини ишга туширишни режалаштирмоқда. Бу ҳақида The Walt Disney'нинг ижрочи директори Роберт Айгернинг берган маълумотига асосланиб, CNBC телеканали хабар берди. 

Унинг сўзларига кўра, онлайн-платформа 2019 йилда АҚШда ишга тушади, кейинчалик бошқа мамлакатларга ҳам ўтилади. Айгернинг таъкидлашича, компаниянинг Netflix билан алоқалари яхши, шундай бўлса-да, у имкониятдан фойдаланиб бу сервисдан ўз контентини олишга қарор қилди. Кинокомпания директори Netflix'дан  Disney фильмлари йўқолишини айтди, шу жумладан Pixar студиясида олинган фильмлар ҳам. Netflix'нинг маълум қилишича, 2018 йилнинг охирига қадар сервисда Disney фильмларини кўриш мумкин. Ундан кейин эса платформада Marvel'нинг сериалларигина қолади. 

Айгернинг айтишича, платформа ишга тушиши билан унда Disney'нинг янги фильмлари тақдим этилади. 2019 йилда кинотеатрларда премьераси кутилаётган "Ўйинчоқлар тарихи-4", "Музлаган қалб-2", шунингдек "Қирол Шер" янги бадиий фильми платформанинг илк фильмлари бўлади. 

Бундан ташқари, Disney 2018 йилнинг бошида ESPN спорт телеканали стримингини ишга туширишни режалаштирмоқда. Унда йилига 10 минг спорт тадбири трансляция қилинади. Шунингдек Disney ўзининг технологик қудратини ошириш учун 1,58 миллиард долларга BAM Tech компаниясининг назорат акцияларини харид қилиши кутилмоқда. 2016 йилнинг августида Disney бу компаниянинг 33 фоизини сотиб олган.