«Арсенал» ярим ҳимоячиси Месут Ўзил Германия терма жамоаси билан ЖЧ-2018 саралаши доирасида Чехияга қарши кечган учрашувдан кейин ўзига билдирилган танқидларга муносабат билдирди.
«Кеча Германия Россияда ўтадиган жаҳон чемпионати учун катта қадам ташлади. Чехия устидан 2:1 ҳисобида ғалаба қозондик. Икки кундан бери терма жамоадаги дўстларим мендан «Арсенал»да нималар рўй бераётгани ҳақида сўрамоқда. Улар жамоадаги ҳолатни инқироз деб ҳисоблашмоқда. Бундай қараш ОАВда бир қатор экспертлар ва жамоанинг собиқ футболчилари билдираётган фикрлар туфайли пайдо бўлган.
Мен Лондондалигимда кўпдан-кўп танқидларни қабул қилиб олмоқдаман. «Ҳаддан ташқари қиммат, ўта очкўз, жисмонан ёмон ҳолатда ва дангаса», – мен ҳақимда шундай дейишмоқда
Бундай фикр билдираётганларнинг кўпчилиги мени билмайди. Яна жамоанинг собиқ футболчилари фикрлар билдиришмоқда – улар «Арсенал» билан муваффақиятга эришган футболчилар. Футболчилар танқид қилиниши табиий, аммо мен футболчилар футболчиларни танқид қилишини тушунмайман, мен афсоналар ўзларини афсоналарга хос тутишини кутгандим. Мен улардан – танқидни тўхтатиб, футболчиларни қўллаб-қувватлашни бошлашни сўраб қоламан.
Бу мавсум қандай кечишидан қатъи назар, мен «Арсенал»даги бешинчи мавсумимни ҳам аъло даражада ўтказишни истайман. «Арсенал» — катта клуб, бу клубда буюклар ўйнашган ва клубнинг ўз анъаналари бор. Бу клуб футболкасини кийишимдан фахрланаман. Ўтган 4 йилда менда ажойиб лаҳзалар бўлди, мен бу лаҳзаларни қадрлайман. Лондондаги, Буюк Британиядаги ва бутун дунёдаги мухлисларга миннатдорчилик билдираман», — дея ёзган у «Фейсбук»даги саҳифасида.
