Индонезияда дарвозабон ўйин вақтидаги тўқнашувдан кейин ҳалок бўлди

Индонезиянинг "Персела Ламонган" футбол клуби дарвозабони Хайрул Худа  "Семен Паданг" клубига қарши учрашувда иккита ўйинчи билан тўқнашувдан кейин ҳалок бўлди. Бу ҳақда goal.com портали хабар бермоқда. 

15 октябрда ўтган учрашувнинг 1-бўлимида "Персела" жарима майдончасида Худа клубдоши Рамон Родригес ва рақиб жамоа ҳужумчиси Марсел Сакраменто билан тўқнашиб кетган. Дарвозабон шундан кейин ҳушини йўқотган.

Учрашувда хизмат кўрсатган тиббий ходимлар футболчига биринчи ёрдам кўрсатишган ва уни майдондан замбилда олиб чиқиб кетишган. Худа шифохонага йўлда ҳаётдан кўз юмган. 38 ёшли футболчининг ўлимига бўйни ва бошидан олган жароҳати сабаб бўлган.

Худа ўз клуби мухлислари орасида афсона ҳисобланарди, у 1999 йилдан бери бутун фаолияти давомида шу клуб учун ўйнаб келган.