Toyota Токиодаги автосалонда водородда ишловчи автобусни тақдим қилади

Toyota Токиода ўтадиган автосалонда ёнилғи ячейкаларида ишловчи двигателга эга Sora автобуси концептини намойиш қилади. 2018 йилда автобуснинг тижорий версияси пайдо бўлади. 2020 йилгача, яъни ёзги Олимпиададан олдин бу автобусдан 100 дан кўпроғи кўчаларда ҳаракатланишни бошлаши режалаштирилмоқда. 

Sora автобуси Toyota Mirai седанида ўрнатилган водород куч қурилмасининг такомиллашган версияси билан жиҳозланган. Бу куч қурилмаси умумий қуввати 154 от кучига эга бўлган иккита электромотор ва водороднинг кислород билан реакцияси вақтида энергия ишлаб чиқарилувчи электрокимёвий генератордан ташкил топган. Автобус 600 литр водород жойлашадиган 10 та бак билан жиҳозланади.    

Бундан ташқари, автобус 9 киловатт қувватга эга 235 киловатт-соатлик ташқи энерготизим билан жиҳозланган. У табиий офатлардан кейин энергия манбаи сифатида қўлланиши мумкин. 

Автобус автоматик йиғилувчи ён ўриндиқлар, велосипедчилар ёки пиёдаларни кўриш учун ташқи камералар ва автобус станцияларидаги линиялар бўйича автоматик тўхташ тизими билан жиҳозланган. Автобус бошқа транспорт воситалари ҳамда йўлдаги қўзғалмас объектлар билан симсиз алоқани қўллаб-қувватлайди ҳамда бошқа автобуслар билан бирга автоматик тарзда ҳаракатланиши мумкин.

Токиодага автосалонда шунингдек марканинг водородда ишловчи Fine-Comfort Ride концепт-кари тақдим қилинади. Бу минивэн туридаги моделнинг юриш захираси 1000 км га яқинни ташкил қилади. Концепт-кар 6 ўринли салон ва ён ойналарда жойлашган проекцион дисплейлар олган. 

Шунингдек, марка ногиронлар учун Concept-i Ride прототипини тақдим қилади. Бу модел "чайка қуши" турида эшиклар, рул ва педал ўрнига жойстиклар, ногиронлар аравасини сақлаш учун махсус жой ва сурилувчи йўловчи ўриндиғи билан жиҳозланган.  

Токио автасалони 27 октябрдан 5 ноябргача давом этади.