Ўзбекистон томони Сайфулло Соипов ўзбекистонлик эканини тасдиқлади

Фото: The Telegraph

31 октябрь куни Нью-Йорк шаҳрида 8 кишининг ўлимига сабабчи бўлган терактни содир этишда гумон қилинган шахс ўзбекистонлик Сайфулло Соипов экани тасдиқланди. Бу ҳақда Жаҳон ахборот агентлиги хабар тарқатди.

Хабарда айтилишича, Сайфулло Соипов 1988 йил Тошкент шаҳрида туғилган. 2005-2009 йилларда Тошкент Молия институтида таҳсил олиб, кейинчалик иш фаолиятини пойтахтдаги «Саёҳат» меҳмонхонасида ҳисобчиликдан бошлаган.

«Ўзбекистон Республикаси ҳуқуқ-тартибот органлари берган маълумотга кўра, 2010 йил АҚШга «грин-карта» орқали виза олиб, жўнаб кетганди. Шу давргача бирор террористик гуруҳ ёхуд оқимлар таъсирида бўлгани аниқланмаган. Ўтган етти йил ичида у Ўзбекистонга ташриф буюрмаган ҳамда яқин қариндошлари билан учрашмаган.

АҚШда бўлган пайтиданоқ Соипов Ўзбекистоннинг Нью-Йорк шаҳридаги консуллик идорасига учрамаган, ҳеч қандай расмий рўйхатда қайд этилмаган.

Сайфулло ўсиб улғайган маҳалла аҳли у ҳақда илиқ фикрларни билдирди: «ҳеч қандай шубҳа уйғотувчи иш билан шуғулланмаган, қўшниларга яхши муомала қилиши таъкидланган», дейилади хабар матнида.

#Нью-Йорк #Сайфулло Соипов

31 октябрь, сешанба куни Манҳэттенда юк машинасини бошқарган шахс одамларни қасддан уриб юбориши оқибатида 8 киши ҳалок бўлди, 12 киши жароҳатланди. Терактни содир этишда гумон қилинаётган шахс келиб чиқишига кўра ўзбекистонлик Сайфулло Соипов.