Рамос Неймарни «Реал»га чақирмоқда

«Реал» ҳимоячиси ва жамоа сардорларидан бири Серхио Рамос «Барселона»нинг собиқ футболчиси, айни вақтда «ПСЖ» сафида тўп сураётган Неймар билан бир жамоада тўп суришга қарши эмас. Айни кунларда ОАВда «Реал» ушбу бразилиялик футболчини сотиб олмоқчи экани ҳақида хабарлар тарқалган.

«Менга энг яхшилар билан бирга тўп суриш ёқади, Неймар ҳам дунёнинг энг кучли футболчиларидан биридир. У «Реал»га «Барселона»дан эмас, «ПСЖ»дан келгани маъқул. Футбол шунақа, ҳар нарса бўлиши мумкин. Албатта, Неймар «Реал»га келиши биз учун фойдали бўлган бўларди. Мен Неймар билан яхши муносабатларга эгаман ва мен унинг келишини ёқлаган бўлардим», — деган Серхио Cadena Ser эфирида.

Рамос Неймар «Барселона»далигида синглисининг туғилган кунига бориш учун атайлаб дисквалификация олгани ва Испания чемпионати ўйинларини ўтказиб юборганини эслаб ҳазиллашди.

«У келишидан олдин унинг синглиси туғилган куни мавзусини муҳокама қилиб оламиз», — деган «Реал» футболчиси юзида табассум билан.