ЖЧда 14-кун. Неймар майдонга қайтди, Корея ютқазиб қўйди

Жаҳон чемпионатида гуруҳ босқичи якунига етмоқда, учинчи турнинг дастлабки куни ҳам воқеаларга бой бўлди. 24 июндан 25 июнга ўтар кечаси 6 та учрашув ўтказилди ҳамда A, B ва C квартетларида жамоаларнинг якуний ўринлари маълум бўлди. Мексика миллий жамоаси Чехияни йирик ҳисобда таслим этди (3:0), ЖАР Жанубий Корея устидан сенсацион ғалабага эришди (1:0), Марокаш Ҳаити билан ўйинда камбэк амалга оширди (4:2), Бразилия Шотландияга ҳеч қандай имкон қолдирмади (3:0), Швейцария Канададан устун келди (2:1), Босния ва Ҳерцеговина эса Қатарни уйига жўнатди (3:1).

Майдон ташқарисида ҳам қизиқарли воқеалар бўлиб ўтди: Жанни Инфантино сув ичиб олиш учун қилинаётган танаффус ФИФАга пул келтирмаслигини маълум қилди, ганалик шаман эса Ҳарри Кейндан тавқи лаънатни «олиб ташлади».

А гуруҳи

Мексика Очоага ҳам имкон берди

Чехия – Мексика 0:3
Голлар: Чавес, 55 (0:1). Кинионес, 61 (0:2). Фидалго, 90+4 (0:3)
Чехия: Коварж, Гранач, Крейчи, Холеш (Соучек, 64, Хори, 87), Черв (Сойка, 87), Садилек, Дудера, Цоуфал, Шулц, Вишински (Провод, 56), Гложек (Шик, 64)
Мексика: Ранҳел (Очоа, 78), Монтес, Рейес, Чавес (Галярдо, 78), Санчес, Алварес, Ромо (Варгас, 63), Мора (Фидалго, 72), Кинионес, Алварадо, Мартинес (Хименес, 63)
Огоҳлантиришлар: Алварес, 64

1/16 финалга чиқиш учун Чехиядан ҳаддан ташқари қийин вазифани уддалаш талаб этиларди – жаҳон чемпионатидаги энг ишончли ҳимоя чизиғини ёриб ўтиш. A гуруҳида дастлабки икки турда ЖАР (2:0) ва Жанубий Корея (1:0) мексикаликлар дарвозасига гол уролмаганди. Бу иш европаликларга ҳам насиб этмади.

Биринчи бўлим тенг курашлар остида кечди, жамоалар чинакамига хавфли вазиятлар ярата олишмади. Аммо танаффусдан кейин турнир мезбонларидан бири ўйинни кучайтиришди ва рақиб дарвозасини уч бор ишғол этишди: Матео Чавес, Ҳулиан Кинонес ва Алваро Фидалго ўз номларига биттадан гол ёздириб қўйишди.

Ўйин якунланиши арафасида мексикалик мухлислар учун яна бир қувончли воқеа рўй берди: бу чемпионатда илк бор жамоанинг афсонавий дарвозабони Гилермо Очоа майдонга тушиб келди. 40 ёшли посбон учун бу фаолиятидаги олтинчи мундиал бўлди. У ўзи муносиб бўлган олқишларга ва қарийб 20 дақиқага эга бўлди.

Чехлар эса иккинчи бўлим давомида ҳам айтарли вазият ярата олмади. Мирослав Коубек шогирдлари гуруҳда сўнгги ўринни эгаллаб, турнирни тарк этадиган бўлди.

ЖАР иккинчи ўрин билан плей-оффга чиқди

ЖАР – Жанубий Корея 1:0
Гол: Масеко, 63 (1:0)
ЖАР: Уилямс, Мбокази, Окон, Модиба, Мудау, Мбата, Ситоле, Мофокенг (Адамс, 80), Апполлис (Мореми, 62), Масеко (Райнерс, 75), Макгопа
Жанубий Корея: Ким Син Гу, Ким Мин Жэ (Пак Жин Сеоб, 66), Ли Ги Ҳек, Ли Хан Бем, Хванг Ин Бом, Пэк Син Ҳо (Кастроп, 46), Ли Тэ Сок (Ким Жин Кю, 46), Сол Ен У, Ҳванг Ҳи Чҳанг (Сон Ҳеунг Мин, 46), Ли Кан Ин, Ҳон Гу О (Гуе Сон Чо, 74)
Огоҳлантиришлар: Модиба, 73 – Гуе Сон Чо, 79

Иккинчи турда Чехия билан дурангга эришган (1:1) жанубий африкаликлар плей-офф йўлланмасини кафолатлаш имкониятидан фойдаланишга қарор қилишди. Иккинчи ўринни эгаллаш учун жамоадан иккинчи ўрин учун асосий даъвогар бўлган Жанубий Кореяни мағлуб этиш талаб этиларди.

Осиёликлар жамоаси ўйиннинг бошланғич қисмини устунликда ўтказди, аммо аста-секин ташаббус ЖАР қўлига ўта бошлади. Уго Брос шогирдлари ўйинни кучайтириб боришди ва майдоннинг иккинчи қисмида кўпроқ ишлаб, тез-тез зарбалар бера бошлади. Ва иккинчи бўлимда ўзи ҳақли бўлган голни уришга эришди: ҳужумчи Тапело Масеко ўз номини таблога ёздириб қўйди. Шундан кейин африкаликлар тўпни рақибга топширди ва сўнгги дақиқаларгача ҳимояда ишончли ҳаракат қилишди.

Минимал ғалаба ва гуруҳдаги иккинчи ўрин жамоани тарихда илк бор плей-оффга олиб чиқди – энди уларни Канадага қарши ўйин кутмоқда. Сенсацион равишда ютқазиб қўйган жанубий кореяликлар эса учинчи ўринга тушиб кетди ва гуруҳ босқичи якунланишини кутиш режимига ўтди.

Шу билан бирга, осиёликларнинг бу мағлубияти қитъанинг бошқа бир вакили – Ўзбекистон учун қимматга тушди. Агар корейслар ўз ўйинида ғалаба қозонганида ЖАР 1 очко билан учинчи ўринда қолган бўлар ва Ўзбекистонга гуруҳдан чиқиш учун рақобатчи бўла олмасди. Корея эса энди тўплар нисбати нисбатан яхшилиги (-1) ҳисобига катта эҳтимол билан учинчи ўрин вакиллари орасидаги саккизликка кира олади. Тўплар нисбати жуда ёмон бўлган (-7) Ўзбекистон энди бу саккизликка кириши учун Конго ДР устидан жуда йирик ҳисобда ғалаба қозониши талаб этилади.

B гуруҳи

Келишилган дуранг бўлмади

Швейцария – Канада 2:1
Голлар: Варгас, 46 (1:0). Манзамби, 57 (2:0). П. Дэвид, 76 (2:1)
Швейцария: Кобел, Элведи, Аканжи, Родригес, Ҳакес (Видмер, 74), Фройлер, Жака, Манзамби (Фасснаҳт, 85), Варгас (Ндой, 80), Соу (Эбишер, 74), Эмболо (Иттен, 85)
Канада: Крепо, Де Фужерол, Корнелиус, Ларея (Шаффелберг, 83), Жонстон, Шуанер (Эуштакиу, 58), Салиба, Аҳмад (Миллар, 58), Бюкенен (П. Дэвид, 74), Ларин (Олувасейи, 58), Ж. Дэвид
Огоҳлантиришлар: Жака, 32 – Ларин, 32. Миллар, 87

Канада ҳам, Швейцария ҳам иккинчи турдан кейин 4 тадан очко жамғариб, амалда плей-офф масаласини ҳал қилганди. Сўнгги турда ўзаро кечадиган ўйинда жамоаларни дуранг ҳам қониқтирарди – шунда Босния ва Ҳерцеговина – Қатар ўйини натижасидан қатъи назар биринчи ва иккинчи ўринлар сақлаб қолинган бўларди.

Ўйиннинг биринчи бўлими давомида амалда ҳам жамоалар дурангга қарши эмасдек кўринди. Аммо иккинчи бўлим бошланиши билан швейцарларнинг ёш юлдузи Жоан Манзамби Рубен Варгасни голли пас билан таъминлади ва ҳисоб очилди. Кўп ўтмай жаҳон чемпионати кашфиётларидан бири бўлаётган ёш вундеркинднинг ўзи ҳисобдаги устунликни мустаҳкамлади.

Аммо турнир мезбонлари шунчаки таслим бўлишни исташмади ва захирадан ўйинга қўшилган Дэвид Промис битта жавоб голини урди. Ўйин охиригача ҳисобни тенглаштириш учун канадаликларда яна бир неча имконият бўлди, аммо ўйин барибир Швейцариянинг ғалабаси билан якунланди (2:1). Шу билан бирга, мағлубият ҳам Жесси Марш шогирдларини иккинчи ўриндан пастга тушириб юбормади – боснияликлар Канададан ўтиб кетиши учун параллел ўйинда ўта йирик ҳисобда ғалаба қозониши талаб этиларди.

Қатар ожизлик қилди

Босния ва Ҳерцеговина – Қатар 3:1
Голлар: Алайбегович, 29 (1:0). Абунада, 34 – автогол (2:0). Ал-Ҳайдос, 42 (2:1). Махмич, 80 (3:1)
Босния ва Ҳерцеговина: Васил, Катич (Ҳажикадунич, 63), Раделич, Колашинац, Малич (Таҳирович, 46), Башич, Шунич (Мемич, 46), Алайбегович (Бурнич, 82), Байрактаревич, Демирович, Жеко (Махмич, 63)
Қатар: Абунада, Лайе, Ҳуҳи, Ал-Браке, Педру Мигел, Фати (Ал-Маннаи, 79), Будиаф (Алмуоз Али, 72), Абдулсалом (Ҳатим, 46), Ал-Ҳайдос (Ал-Ганеҳи, 55), Эдмилсон Жуниор (Ал-Аелдин, 79), Афиф
Огоҳлантиришлар: Махмич, 82 – Фати, 78

Қатарликлар ўтган турда Канададан ўта йирик ҳисобда ютқазганига қарамай (0:6), ҳамон учинчи ўрин орқали плей-оффга чиқиш имкониятини сақлаб турганди. Бунинг учун Босния ва Ҳерцеговинани имкон қадар йирик ҳисобда мағлуб этиш талаб этиларди.

Аммо 18 ёшли Карим Алайбегович 29-дақиқада қатарликларнинг умидларини сўндирди. У жаҳон чемпионатида гол урган энг ёш футболчилар ўнлигига кириб, Ламин Ямал ва Лионел Мессини ортда қолдирди.

Кўп ўтмай Қатар ўз футболчисидан ҳам гол ўтказиб юборди: Султон Ал-Браке автогол муаллифига айланди. Шундан кейин барча европаликлар ҳисобни йириклаштиришига тайёрлана бошлади (боснияликларга иккинчи ўринга чиқиш учун яна 7 та гол керак бўларди), лекин бўлим охирларида Ҳасан Ал-Ҳайдос ҳисобни қисқартирди.

Қатарликларда бундан ортиғига куч топилмади. Ўйин охирида Эрмин Махмич яна бир гол урди ва якуний ҳисобни ўрнатди – 3:1.

Қатар кутилганидек гуруҳда тўртинчи ўринни эгаллади, аммо шу куни арабларда ҳам ўз қитъадошлари – Ўзбекистонга ёрдам бериш имконияти бор эди. Агар бу ўйинда дуранг натижа қайд этилганида Босния ва Ҳерцеговина икки очко билан қолар ва плей-офф учун курашдан чиққан бўларди. Аммо энди тўрт очкога эга бўлган бу жамоа катта эҳтимол билан учинчи ўринлар орасидаги саккизликнинг энг юқорисида бўлади.

C гуруҳи

Ҳаити марокашликларга муаммо туғдирди

Марокаш – Ҳаити 4:2
Голлар: Буну, 10 – автогол (0:1). Ҳакими, 39 (1:1). Изидор, 43 (1:2). Сайбари, 45+1 (2:2). Раҳими, 78 (3:2). Ёсин, 89 (4:2)
Марокаш: Буну, Риёз, Ҳалҳал, Салоҳиддин (Мазравий, 83), Ҳакими, Амрабат, Ал-Айнавий (Ал Мурабет, 83), Сайбари (Унаи, 70), Ал-Ҳаннус, Диас (Раҳимий, 70), Ал-Кааби (Ёсин, 70)
Ҳаити: Пласид, Аде, Делкруа, Эксперенс, Дюверн (Аркус, 80), Беллегард, Дэнли (Симон, 80), Провиденс (Дидсон, 67), Казимир, Жозеф (Перро, 83), Изидор (Назон, 67)
Огоҳлантиришлар: Пласид, 79. Назон, 79. Казимир, 90

C гуруҳида Марокаш ва Ҳаити ўртасидаги кечган ўйинда эса амалда интрига йўқ эди. КОНКАКАФ вакиллари дастлабки турларда ютқазиб, плей-оффга чиқишдан умид узганди, биринчи турда Бразилиядан очко тортиб олган (1:1) ва кейин Шотландияни минимал ҳисобда мағлуб этган (1:0) африкаликлар эса ўзини жуда қулай ҳис қилаётганди. Бундай ўйинда футболчилар мухлислар учун ўйнашди ва голлар шоусини уюштиришди.

Ва барчаси Ҳаити кутилмаганда тезкор гол уриши билан бошланди: 10-дақиқадаёқ Ленни Жозеф қанотдан оширилган тўпга товони билан зарба берди, тўп дарвозабонга теккан ҳолда йўналишини ўзгартириб, тўрга бориб тушди. Африкаликлар жавоб қайтариш учун олдинга ташланишди ва бир қанча супервазиятлар яратишди ва фақат 39-дақиқага келиб Ашраф Ҳакимининг саъй-ҳаракатлари билан ҳисобни тенглаштиришди. Аммо ҳаитиликлар дарҳол жавоб қайтаришди – «Сандерленд» ҳужумчиси Вилсон Изидор тўққизлик томон кучли зарба йўллади.

Биринчи бўлимга қўшиб берилган дақиқаларда эса Исмоил Сайбари яна мувозанатни тиклади (у қаторасига уч ўйинда гол урмоқда) ва жамоалар танаффусга 2:2 ҳисобида йўл олишди.

Иккинчи бўлимда ўйин суръати пасайди. Ҳаитиликлар дуранг ҳисобни сақлаш ва жаҳон чемпионатидаги илк очкосини қўлга киритишга ҳаракат қилишди, аммо буни уддалай олишмади. Ўйин охирида марокашликлар захирани ишга солиб, Суфён Раҳимий ҳамда Жасим Ёсиннинг голлари эвазига ишончли ғалабага эришди – 4:2.

Винисиус Мессини таъқиб қилмоқда

Шотландия – Бразилия 0:3
Голлар: Винисиус Жуниор, 7 (0:1). Винисиус Жуниор, 45+3 (0:2). Куня, 60 (0:3)
Шотландия: Ганн, Ҳендри, Маккенна, Робертсон (Тирни, 46), Паттерсон (Ралстон, 81), Фергюсон, Маклин, Мактоминай, Макгинн (Кертис, 90+1), Доук (Кристи, 81), Шенкленд (Адамс, 90+1)
Бразилия: Алиссон, Габриэл Магаляйнс, Маркиниос, Дуглас Сантос (Алекс Сандру, 82), Данилу Луис, Каземиро (Фабинио, 66), Лукас Пакета (Мартинелли, 66), Гимарайнс, Винисиус Жуниор, Райан (Эндрик, 82), Куня (Неймар, 76)
Огоҳлантиришлар: Кристи, 89 – Данилу Луис, 62. Фабинио, 82

Параллел баҳсда Бразилия гуруҳда биринчи ўринни эгаллашни мақсад қилган ҳолда ҳаракат қилди. Шотландларнинг бу ўйин учун тактикаси тушунарли эди: уларни кичик ҳисобдаги мағлубият ҳам қониқтирарди ва жамоа илк дақиқалардан чуқур ҳимояланди. Аммо бу режа еттинчи дақиқадаёқ бузилиб кетди: европаликлар қисқа тўп узатишлар билан ҳимоядан чиқишда хатога йўл қўйишди, пентакампеонлар муваффақиятли прессинг уюштиришди ва Винисиус Жуниор ҳисобни очди.

Биринчи бўлим охирларида Бразилиянинг босими яна натижа келтирди: Бруну Гимарайнс «Реал» вингерига ҳаводан тўп оширди – у эса тўпни ўзига бўйсундириб, дублни расмийлаштирди. Қаторасига учинчи ўйинда гол ураётган Вини энди тўпурарлар пойгасида 4 гол билан Мессини (5) таъқиб этувчилар гуруҳига қўшилди (Ҳоланд ва Мбаппеда ҳам ҳозирча 4 тадан гол бор). 60-дақиқада эса Матеус Куня ҳам ўз ҳисобига гол ёзиб қўйиб, жанубий америкаликларнинг йирик ҳисобдаги ғалабасини таъминлади – 3:0.

Шундан кейин жамоалар суръатни пасайтиришди ва ўйиннинг асосий воқеаси рўй берди: жароҳатидан тузалган Неймар майдонга олқишлар остида тушиб келди. Бразилия тарихидаги энг яхши тўпурар миллий жамоада 2023 йилдан буён ўйнамаётганди, Карло Анчелотти эса унга имконият берди.

Футболчи мураббийнинг ишончини оқлади ва ўзига берилган дақиқаларда йўқолиб қолмади: шерикларига вазиятлар яратди ва ўзи ҳам бир бор зарба берди. Унда ҳали гол уриш учун ҳам имконият бўлиши мумкин – жамоа гуруҳда биринчи ўринни олиб, плей-оффга чиқди.

ФИФА ўйин вақтидаги паузалар орқали пул ишламаяпти

Жаҳон чемпионатида бўлимлар ўртасида юзага келаётган ва уч дақиқа давом этаётган танаффуслар мухлисларда ҳам, мураббийларда ҳам норозилик уйғотмоқда.

Кўпчилик бу қоидада «ФИФАнинг қўли борлиги»ни, реклама слотлари кўпайиши эвазига ташкилот кўпроқ пул ишлаётганини тахмин қилганди. Аммо Жанни Инфантино бундай айбловни рад этиб чиқди.

«ФИФАда қўшимча даромад йўқ, чунки барча тижорат шартномалари олдиндан имзоланган. Биз учун бу молиявий масала эмас, балки соф спорт масаласи», – дея ФИФА раҳбарининг сўзларини келтиради ташкилот сайти.

Кейндан тавқи лаънат «олиб ташланди»

Ганадан бўлган шаман Нана Кваку Бонсам ўз жамоасининг Англия билан ўйинидан олдин рақиблар ҳужумчиси Ҳарри Кейнни лаънатлаганини айтиб чиққанди. Натижада ушбу футболчи яққол голли вазиятдан фойдалана олмади ва ўйин дуранг ҳисобда якунланди (0:0) ва кўпчилик ушбу шаманнинг сўзларига ишониб қолди.

Ўйиндан кейин эса ушбу сеҳргар футболчига гол уришда давом этиши мумкинлигини билдирди. «Мен дунёдаги энг қудратли шаманман. Энди Англиянинг кейинги ўйинларида гол ура олиши учун Кейнни озод этаман. Мендан хафа бўлмасин», – дея Бонсамнинг сўзларини келтирган Daily Star.

Беллингҳэм нега четлатилмади?

Айнан Гана билан бўлиб ўтган ўша ўйин (0:0) ортидан Жуд Беллингҳэм можароли ҳолат марказида қолди. У ўйиннинг 38-дақиқасида ганаликлар ҳужумчиси Жордан Айю билан гаплашаётганида оғзини қўли билан бекитиб олганди, янги қоидаларга кўра эса бу ҳаракат қизил карточка билан жазоланиши керак.

Турнир давомида худди шундай ҳолат учун Парагвай ҳужумчиси Мигел Алмирон майдондан четлатилганди. Жуднинг вазияти эса ҳакамлар эътиборидан четда қолди.

Парагвай футбол федерациясидагилар норозилик билдириб чиқди.

«Қоида барча жамоаларга бир хил қўлланиши керак, акс ҳолда у ўз обрўсини йўқотади», – дея ташкилотдаги манбанинг сўзларини келтиради AS нашри.

Навбатдаги ўйинлар

Учинчи тур авжига чиқмоқда. 25 июн куни кечқурун ва 26 июнга ўтар кечаси яна олтита ўйин бўлиб ўтади:

01.00 Кюрасао – Кот-д'Ивуар
01.00 Эквадор – Германия
04.00 Тунис – Нидерландия
04.00 Япония – Швеция
07.00 Парагвай – Австралия
07.00 Туркия – АҚШ