Мисрнинг Синай яриморолидаги масжидда содир этилган теракт қурбонлари сони 235 нафарга етди. Бу ҳақда Миср давлат телевидениеси маълум қилди. Ҳалок бўлганлар орасида болалар ҳам бор, деб хабар бермоқда “Ар-Арабия” телеканали.
130 га яқин одам яраланган.
24 ноябрда Шимолий Синай вилоятининг пойтахти Ал-Аришдан 40 км узоқликда жойлашган Ар-Рауд аҳоли пунктидаги масжидда жума намози вақтида портлаш содир этилган. Масжидни 4 та машинада қуршаб олган жангарилар портлашдан кейин масжиддан югуриб чиқаётган одамларни ўққа тутганлар. Гувоҳларнинг айтишича, жангарилар, шунингдек, воқеа жойига келаётган тез ёрдам машиналарини ҳам ўққа тутганлар.
Мамлакатда теракт қурбонлари хотирасига 3 кунлик мотам эълон қилинди. Айни вақтда бирорта ҳам террорчилик гуруҳи ушбу теракт учун жавобгарликни ўз зиммасига олмаган.
