Ўзбекистоннинг Киевдаги элчихонаси томондан ўтказилган Ўзбекистон-Украина амалий учрашуви натижалари ўзбек пахтасидан тайёрланган, IDEAL ўзбек тўқимачилик корхонасининг болалар куртклари ва комбинезонларининг Украинада 45 та гипермаркетга эга “Эпицентр” савдо тармоғига етказиб берилишига сабаб бўлди.
“Эпицентр”нинг ҳудудий директори Б.Артари-Колумбнинг айтишича, IDEAL маҳсулотлари пештахталарда туриб қолмай, тез сотилмоқда.
“Айни вақтда табиий матолардан тайёрланган маҳсулотлар соғлом экологияни танловчи одамлар орасида тобора оммалашмоқда. Бугунги кунда ўзбек ишлаб чиқарувчиларининг болалар кийимлари ва умуман тўқимачилик маҳсулоти янги техник характеристикага эга, аллергик реакциялар келтириб чиқармайди, соғломлаштирувчи эффектга эга”, деб айтган Артари-Колумб.
“Шу сабабли ўзбекистонлик ҳамкорлар билан маҳсулотлар ассортиментини кенгайтириш ва импорт ҳажмини оширишни муҳокама қилмоқдамиз. Ўзбекистоннинг тўқимачилик маҳсулотлари ўз кўрсаткичлари ва сифати эвазига Украина бозорида ўз позицияларини мустаҳкам ушлаб туришига ишончимиз комил”, деб қўшимча қилган Артари-Колумб.
