Трамп Афғонистон, Ҳаити ва Нигериядан келганлар ҳақида камситиб гапирган – ОАВ

АҚШ президенти Дональд Трамп АҚШнинг иммиграция сиёсатига бағишланган брифингда мамлакатга Афғонистон, Ҳаити ва Нигериядан жуда кўп одамлар келаётганидан норозилик билдирган ҳамда улар ҳақида камситувчи гаплар айтган. Бу ҳақда The New York Times (NYT) нашри хабар бермоқда. 

Нашр манбаларининг маълум қилишича, ушбу учрашув Оқ уйда июнда бўлиб ўтган. Учрашувда Трамп, унинг бир қатор ёрдамчилари ва маслаҳатчиларидан ташқари, АҚШ давлат котиби Рекс Тиллерсон ва ўша пайтда АҚШ миллий хавфсизлик вазири лавозимини эгаллаган Жон Келли иштирок этган.    

Таъкидланишича, Трамп Овал хонага дарғазаб ҳолда, шиддат билан кириб келган. Трамп АҚШ иммиграция сиёсатини қатъийлаштиришга уринишларига қарамай, январь ойидан мамлакатга кўплаб хорижликлар келганидан дарғазаб бўлган.  

Трампда унинг маслаҳатчиларидан бири Стивен Миллер томондан тузилган рўйхат бўлган. Таъкидланишича, ҳужжатда 2017 йилда АҚШга кириш учун қанча муҳожир виза олгани ҳақида маълумот бўлган. Сўнгра Трамп бу рўйхатни танқидий изоҳлар бериш билан ўқий бошлаган.

Трамп таъкидлаганидек, виза олганлардан 2,5 минги Афғонистондан келган. Трамп бунга изоҳ бериб, Афғонистонни “террорчилар учун бошпана” деб атаган. Трамп АҚШга келган 15 минг ҳаитилик ҳақида гапира туриб, “уларнинг барчаси ОИТС билан касалланган” деб айтган. Трамп Нигериядан 40 минг киши келганини таъкидлаб, улар АҚШдаги ҳаётни кўриб, “икки дунёда ҳам ўзларининг Африкадаги кулбаларига қайтиб кетмасликларини” айтган.

Учрашувда Келли ва Миллер АҚШга жуда кўп одам келаётгани учун Тиллерсонни қаттиқ танқид қилишган. Тиллерсон бунга жавобан “Балки АҚШга кириш учун визаларни тўлиқ бекор қилиш ҳақида кўрсатма беришим керакдир?” деб жавоб қилган. Сўнгра Келли маъмуриятнинг кўплаб ходимларидан хонадан чиқиб кетишларини сўраган. Бироқ хонани тарк этаётганлар Трамп баланд овозда баҳслашаётганини эшитишган.

Кейинроқ Оқ уй матбуот котиби Сара Сандерс NYT журналистларига Трамп брифингда муҳожирлар ҳақида камситувчи гаплар айтмаганини маълум қилган. Сандерс бу “куракда турмайдиган айбловларни” Келли, Тиллерсон ва бошқалар рад этишлари мумкинлигини, NYT манбаларининг тасдиқларини эса ёлғон деб айтган.