1 январдан Ўзбекистон халқаро аэропортларида икки йўлакли тизим кучга киради

Вазирлар Маҳкамасининг 2017 йил 11 октябрдаги қарори билан Ўзбекистон Республикаси божхона чегараси орқали ўтказиш пунктларида икки йўлакли тизимни қўллаш тартиби тўғрисидаги Низом тасдиқланиб, 2018 йил 1 январдан Ўзбекистон Республикаси халқаро аэропортларида икки йўлакли тизим кучга кириши белгиланди. Бу ҳақда KUN.UZ’га Адлия вазирлиги хабар берди.

Низомга кўра, “Яшил” йўлак – кириб келиш ва чиқиб кетиш жойларида махсус белгиланган, жисмоний шахсларнинг нотижорат мақсадлардаги қўл юки ва кузатиб борилаётган багаждаги товарларни божхона чегарасидан олиб ўтиши учун мўлжалланган жой.

“Қизил” йўлак – кириб келиш ва чиқиб кетиш жойларида махсус белгиланган, жисмоний шахсларнинг ёзма шаклда декларацияланиши лозим бўлган қўл юки ва кузатиб борилаётган багаждаги товарларни, шунингдек декларацияланиши жисмоний шахснинг ихтиёрига кўра амалга ошириладиган товарларни божхона чегарасидан олиб ўтиш учун мўлжалланган жой.