Airbus ўз тарихидаги энг йирик буюртмани қўлга киритди

Европанинг авиасозлик концерни Airbus АҚШнинг Indigo Partners инвестицион компанияси билан A320neo оиласига мансуб 430 та самолёт етказиб бериш бўйича битим тузди.

Буюртманинг умумий қиймати Airbus учун рекорд даражадаги қиймат – 49,5 млрд долларни ташкил қилди.

Ҳаво транспорти тармоғига ихтисослашган Indigo Partners самолётларни ўз лоукостерлари: АҚШнинг Frontier Airlines, Чилининг JetSMART, Мексиканинг Volaris ва Венгриянинг Wizz Air компаниялари учун буюртирган. 

Битим 273 та A320neo ва 157 та A321neo самолётларини етказиб беришни ўз ичига олади.

Компаниялар битим ҳақида ноябрда келишиб олишган. Ўшанда самолётлар 2022 йилдан етказиб берилиши маълум қилинган.

Airbus Group аэрокоинот соҳасидаги етакчилардан бири ҳисобланади. Концерн 2000 йилда Германиянинг Daimler-Benz Aerospace AG, Франциянинг Aerospatiale-Matra ва Испаниянинг CASA компаниялари бирлашиши натижасида ташкил топган.