АҚШ президенти Дональд Трамп Фаластинга «жуда катта миқдордаги пулларни» ажратиш бўйича масалани қайта кўриб чиқиш лозимлиги ҳақида маълум қилди. Бу ҳақда у твиттердаги саҳифасида ёзган.
Унинг сўзларига кўра, «биз нафақат Фаластинга, балки бошқа кўплаб мамлакатларга ҳам ҳеч нарса эвазига миллиардлаб доллар берамиз».
Трампнинг маълум қилишича, «масалан, биз фаластинликларга бир йилда юзлаб миллион доллар тўлаймиз». Америка президентининг таъкидлашича. Фаластин «Исроил билан тинч шартнома бўйича музокаралар олиб боришни хоҳламаяпти».
«Нима учун биз келажакда тинчлик ҳақида гаплашишни истамаётган фаластинликларга йирик тўловларни юборишимиз керак», - дея маълум қилди Трамп.
Эслатиб ўтамиз, аввалроқ АҚШнинг БМТдаги доимий вакили Никки Ҳейли Қўшма Штатлар маъмурияти ҳозирча Покистонга 255 млн долларлик ёрдам пулини тақдим этмаслиги ҳақида маълум қилганди ва ушбу мамлакатни терроризм муаммосига нисбатан “икки хил ўйинда” айблаганди.
