Альба «Реал» ҳақида: бизни бундай натижалар учун ўлдиришган бўларди

Испаниянинг «Барселона» футбол клуби ҳимоячиси Хорди Альба ўз жамоаси Примерадаги чемпионлик учун курашда Мадриднинг «Реал» клубидан анча олдинга ўтиб кетгани ҳақида гапирди. Айни дамда каталонияликлар ҳисобида 51 очко бўлса, «қаймоқранглиларда» - 32.

«Агарда биз «Реал»дан 19 очко ортда қолаётган бўлганимизда, Барселонада бизни ўлдиришган бўларди. Албатта, биз жуда олдинга ўтиб кетганмиз, бироқ «Реал» охиригача курашади.

Муваффақиятнинг сири жамоанинг ўзида. Бизда ҳамма 100 фоизга ўйнамоқда. Албатта, ҳужумдаги футболчилар жуда муҳим ўрин тутади», - дея Альбанинг сўзларини келтиради Marca.

Эслатиб ўтамиз, аввалроқ Каталония клуби «Реал Сосьедад»ни меҳмонда 4:2 ҳисобида мағлубиятга учратгани хабар қилинганди. Луис Суарес баҳсда дубль қайд этган бўлса, Паулиньо ва Лионель Месси биттадан гол урди.