Неймар янги Фигу бўладими? «Реал» уни Роналдуга алмашмоқчи

Футбол тарихида яна бир йирик трансфер рўй бериши ҳақида миш-мишлар болаламоқда. Криштиану Роналду «Реал»дан, Неймар «ПСЖ»дан кетишни истаётгани ҳақидаги хабарлар фонида икки гранд жамоа ушбу футболчиларни алмаштириши мумкин.

Париждан кўнгил совиш

Ўтган йилнинг августида 222 миллион евро эвазига «Барселона»дан «ПСЖ»га ўтиб, трансферлар рекордини ҳеч ким ета олмайдиган чўққига етказиб қўйган Неймар яна Испанияга қайтишни истаётгани ҳақидаги хабарлар ноябрь ойидаёқ пайдо бўлди. Кимдир Неймар Парижда зерикаётгани ҳақида гапирди ва ОАВ унинг номини «Реал» билан боғлай бошлади. Кавани билан пенальти борасидаги баҳс оловга мой қуйди (икки лотин америкалик футболчи пенальтини ким тепишини ҳал қила олишмаганди). Қўшимча машғулотдан бўйин товлаганидан кейин Неймар ва бош мураббий Унаи Эмери муносабатлари ҳам совуқлашди, бразилиялик футболчи жамоанинг аргентиналик легионерлари Ди Мария ва Пасторе билан ҳам яхши муносабат ўрната олмади (Ди Мария собиқ мадридиста сифатида Неймар билан олдиндан яхши муносабатда бўлмаган, Пасторе эса Неймарга ўзининг ўйин рақамини беришга мажбур бўлганди). Терма жамоа ихтиёрида эканида ундан Парижга қандай мослашгани ҳақида сўрашганида у йиғлаб юборган, терма жамоа мураббийи уни базўр овутганди. Бу воқеалардан кейин Мадриддан унга совчилар бора бошлашди.

Неймар яна ўз трансферини сотиб олиши мумкинми?

Испаниядаги El Chiringuito нашри сенсацион хабарни эълон қилди: эмишки, футболчининг Париж клуби билан шартномасида белгиланган товон пули миқдори у сотиб олинган 222 миллион еврога тенг, футболчининг ўзи «Реал» шу пулни тўлаб, уни олиб кетишини истамоқда. Бу ҳолда Неймарнинг ўзи яна бу пулни тўлаб, Мадридга трансфер қилинишини таъминлаши мумкин бўларди. Аммо бир неча кун ўтиб парижликлар клуби вакиллари бу хабарларни инкор қилиб, «алдаш яхши эмаслиги»ни айтиб чиқишди.

Роналду билан рокировка

«Реал» Неймарни олиб кетиши мураккаб иш. Marca Неймарнинг трансфери «Қироллик клуби»га 400 миллион еврога тушиши, шу туфайли «Реал» 2019 йил ёзигача йирик трансферлар амалга оширмаслиги ҳақида ёзди. Бир неча манба икки клуб президентлари Флорентино Перес ва Носир Ал-Хилайфийнинг дўстона муносабатлари туфайли жамоалар ўз етакчиларини ошириши ҳақиқатга яқин экани ҳақида бонг ура бошлашди.

Турган гапки, айни пайтда Роналдуни Неймарга алмашиш варианти устида Перес икки марта ўйлаб ўтирмайди. Биринчидан, Криштиану Роналду бир ойдан кейин 33 ёшга чиқади (бразилиялик футболчи эса ҳали 26 ёшда). Иккинчидан, Неймар Мадридда ҳам космик миқдорда маош олиши керак ва Мадриддагилар иккита юлдузи учун катта маблағни маош сифатида тўлашни маъқул кўрмаган бўларди. Пойтахтликлар клуби ёки Роналдунинг ҳам маошини Неймарники билан тенглаштириши ёки ундан қутулиши талаб этилади. Иккинчи вариант Пересни молиявий жиҳатдан тўла қониқтиради. Учинчидан, Роналдунинг ўзи кетишни истамоқда, у ҳозир Парижга ўтмаса, шартнома муддати тугаганида, 2 йилдан кейин у бу жамоага керак бўлмай қолади. Шу туфайли Мадрид Неймарнинг трансфер нархига Роналдуни қўшиб бериши ҳақида хабарларда асос бор.

Қолаверса, Роналду ўзини клуб раҳбарияти, хусусан, Флорентино Перес томонидан алданган ҳис қилмоқда. У клуб президенти маошини кўтаришга ваъда бериб (Лионель Месси ва Неймарники каби камида 40 миллион евро - йиллик маош), бу ваъдани бажармай келаётганидан хафа.

Перес рози

Португалиядаги Diario Record нашри тарқатган хабарга кўра, Флорентино Перес Роналдунинг агенти Жорже Мендеш билан гаплашган ва у мижози учун янги клуб ахтаришни бошлаши мумкинлигини айтган.

Перес португалиялик футболчи учун унинг шартномасида белгиланган 1 миллиард еврони талаб қилмайди ва «Реал» Криштиануни муносиб баҳога сотишга рози бўлади.

Ўз навбатида «ПСЖ» Роналдуни сотиб олишга рози бўлмоқда. Аммо французлар «Реал»га  Неймарни бермоқчи эмас.

Испания матбуоти эса Неймар ёзда Мадридга йўл олиши ҳақида ишонч билан ёзмоқда.

Учинчи уриниш

Неймарнинг йўли шу вақтгача «Реал» билан икки марта кесишган. 14 йил олдин 12 ёшида Неймар отаси ҳамда агенти Вагнер Рибейру билан бирга Мадридга келганди. Бу ташрифдан мақсад «Қироллик клуби» мураббийларида яхши таассурот қолдириш ва шартнома имзолаш бўлганди. Ўшанда Неймар илк машғулотда тенгдоши Дани Карвахаль билан танишган, Неймарлар оиласи пойтахтда 2 ҳафта ўтказишган. Мураббийлар унинг ўйинидан қониқиш ҳосил қилган, аммо ўшанда Рибейру шартнома имзоланиши учун талаб қилган 60 минг еврони кўп кўришганди. Натижада, Неймар Бразилияга қайтиб кетган.

Иккинчи уриниш 2013 йилда рўй берган. Ўшанда Сан-Паулуга «Реал»нинг тиббий бўлими раҳбари Карлос Диес Неймарнинг ҳолатини текширувдан ўтказиш учун учганди. Бу ҳақда билган «Барселона» эса «отни қамчилайди» ва бразилиялик футболчи якунда Испания пойтахтига эмас, Каталония пойтахтига келади. Учинчи уриниш муваффақиятли бўладими, Неймар янги Фигу бўлишга ва «Камп Ноу»да ўзига қаратиладиган ғазабни қабул қилишга тайёрми? Буни яқин ярим йил ичида билиб олишимиз мумкин.