Жанубий кореялик чанғичилар машғулот ўтказгани Шимолий Кореяга жўнашди

Фото: Yonhap

31 январда жанубий кореялик чанғичилар шимолий кореялик спортчилар билан бирга машғулот ўтказиш учун Шимолий Кореяга жўнашди. Машғулотлар Олимпиадага тайёргарлик кўриш доирасида Канвондо вилоятидаги “Масикрён” мажмуасида ўтказилади. Yonhap ахборот агентлигининг маълум қилишича, Жанубий Корея делегациясига 45 киши, жумладан журналистлар ва кузатиб борувчилар гуруҳи киради.

Делегация чартер рейс билан Кальма аэропортига келади ва 1 февралда Олимпиадада иштирок этувчи бир неча шимолий кореялик билан ортга қайтади.

Таъкидланишича, Сеул ўз сафарини Вашингтон билан келишиб олди, чунки ўтган йил АҚШ Шимолий Корея ҳудудида бўлган самолёт ва кемаларга АҚШга келишни тақиқлаганди. Шу сабабли Жанубий Корея вакилларининг Шимолга ташрифи охирги лаҳзаларгача савол остида қолаётганди.

Пёнгчангдаги Олимпиада 9-25 февраль кунлари бўлиб ўтади.

Тайёрлаган: Шуҳрат Раҳимов

#Шимолий Корея #Жанубий Корея #Пёнгчанг #Қишки олимпиада