Эрон янги баллистик ракетасини тақдим қилди

Эрон ҳукумати Теҳронда ислом инқилобининг 39 йиллиги муносабати билан ўтказилган тадбирда янги “Қадр” баллистик ракетасини тақдим қилди. Fars ахборот агентлигининг маълум қилишича, суюқ ёқилғида ишловчи ракета камида 2 минг кмлик масофани ўта олади.  

Таъкидланишича, ракета яратувчилари уни ҳам ҳаракатланувчи пуск қурилмасидан, ҳам шахтадан отиш имкониятини назарда тутишган. Ракета учирилганини эҳтимолий душмандан яшириш учун у махсус ҳимоя тизими билан жиҳозланган. 

Дастлабки маълумотларга кўра, ракета турли мўлжалларни нишонга олиши учун ажралувчи каллак билан жиҳозланиши мумкин.   

Байрам тадбирларида Эрон ҳарбий-саноат мажмуасининг бошқа янги ишланмалари ҳам тақдим қилинган. Жумладан, яқин масофаларга мўлжалланган “Фажр-5” ракетаси модификацияси ва “Тўфон 2-М” танкларга қарши ракетаси намойиш қилинган. Шунингдек, оммага айни вақтда синовдан ўтказилаётган, “Фотиҳ” синфидаги сув ости кемасининг истиқболли модели тақдим қилинган.