Флоридадаги мактабда содир этилган отишма оқибатида 17 киши ҳалок бўлди

14 февраль кундузи Флорида штатидаги Паркленд шаҳрида (Майамидан 60 км узоқликда) жойлашган Marjory Stoneman Douglas High School мактабида отишма содир этилди. Отишма оқибатида камида 17 киши ҳалок бўлган, 14 киши жароҳат олган. 

Таъкидланишича, мактабда 14 ёшдан 18 ёшгача бўлган 3 мингга яқин бола ўқийди. 

Полициянинг маълум қилишича, отишмани содир этишда аввал шу мактабда ўқиган, 1999 йилда туғилган 19 ёшли Николас Круз исмли кимса гумон қилинмоқда. У қўлга олинган. Мактаб ўқитувчиларидан бирининг айтишича, у ўтган йил синфдошларига таҳдид қилган. Шундан кейин унга мактаб ҳудуди бўйлаб рюкзак билан юриш тақиқланган ва охир-оқибат у мактабдан четлатилган. 

Гувоҳларнинг айтишича, гумонланувчи отишмани содир этишдан аввал ёнғин сигнализациясини ишга тушириб, сўнгра саросима бошланганда, одамларни ўққа тута бошлаган.

Дастлабки маълумотларга кўра, гумонланувчи AR-15 яримавтоматик милтиғига ўхшаш қуролдан фойдаланган.

Мактабни ҳафта охиригича ёпишга қарор қилинган. 

АҚШ президенти Дональд Трамп бўлиб ўтган ҳодисани Флорида губернатори Рик Скотт билан муҳокама қилган ҳамда ўз ёрдамини таклиф қилган. Трамп, шунингдек, ҳалок бўлганлар ва жароҳатланганлар оилаларига ҳамдардлик билдирган.    

Маълум қилинишича, Паркленд аҳолиси 31 минг кишидан иборат бўлиб, 2016 йилда Флоридадаги энг хавфсиз шаҳар деб топилганди.