Аргентинадаги Россия элчихонасидан топилган 400 кг кокаин машмашаси

Буэнос-Айресдаги Россия элчихонаси қошидаги мактабда 400 килограммга яқин кокаин топилди, уни Москвага жўнатмоқчи бўлишгани тахмин қилинмоқда. РФ ва Аргентина махсус хизматлари қўшма операция доирасида наркотрафикка алоқадорлиги гумон қилинаётган 5 кишини қўлга олишди. Уларнинг қаторида элчихонанинг собиқ ходими ҳам бўлиб, у кокаинни Россияга юборишга тайёрлаётгани тахмин қилинган. Шу муносабат билан россиялик амалдорлар ноқулай саволларга жавоб беришларига тўғри келди, дейилади "Медуза" сайтида.

Россия ТИВда дастлаб кокаинни мактабда техник ходим қолдиргани ва бугунга келиб у дипломатик миссияда ишламаслиги  айтилди. Шундан сўнг Россиянинг Аргентинадаги элчиси Виктор Коронелли кокаинни мактабга элчихонанинг собиқ хўжалик ишлари мудири Али Абьянов олиб кирганлиги тўғрисидаги тахминни тасдиқлади. Коронеллининг сўзларига кўра, Абьянов мактаб комплекси гаражидан эркин фойдаланиши мумкин бўлган ва омборга чекловсиз кириш имконига эга бўлган, охир-оқибат айнан шу ерда кокаин топилган. 

Буэнос-Айресда яшаб, фарзандларини кокаин топилган мактабга олиб борувчи Максим Миронов ўз блогида ТИВни элчихонанинг бошқа ходимлари кокаин ташишга даҳлсиз эканлигига доир ёлғонда айблади. Блогернинг сўзларига кўра, мактабда хавфсизлик режими шу даражадаки, унинг ичидан 12 чемодан гиёҳванд моддани шунчаки олиб ўтишнинг иложи йўқ. 

ТИВ телеграмда бунга жавоб қайтариб, Мироновни "маҳаллий мухолифат етакчиси" ролига даъвогар деб атади. Идорада Мироновнинг фарзандлари сирттан ўқиши қайд этилди - бу эса уларнинг мактабга йилда фақат икки марта ота-она ҳамроҳлигида келиши мумкинлигини билдиради. Хатда ёзилишича, техник ходимлар мактабнинг барча хоналарига чекловсиз кириш имконига эга, таътил даврида эса бинонинг муҳофаза тизими  умуман ишламайди, бу эса "ёвуз ниятли кишиларнинг мақсадини сезиларли даражада осонлаштириши мумкин".

Аргентина ОАВда тақдим этилган аудиоёзувларда исми "О" ҳарфидан бошланувчи элчихона ходими қулоққа чалинади. Унга "12 қути коньяк" етказиб беришни таъминлаб мурожаат қилишади. "О" жавоб беради: "Мен бунга аралашишни хоҳламайман. Узр, муаммо орттиришим мумкин". Мироновнинг тахмин қилишича, "О" - аслида элчининг хавфсизлик бўйича ёрдамчиси Олег Воробьёв. ТИВ бунга ҳеч қандай изоҳ бермади. 

Элчихонада кокаин 2016 йилда топилган, бир йилдан кейин эса гиёҳванд модда ун билан алмаштириб қўйилган чемоданлар ички ишлар ходимлари назорати остида Россияга йўлланган. Москвада уни қабул қилувчилар, шу жумладан Абьянов қўлга олинган. Аргентина ОАВ дастлаб кокаин Россияга Хавфсизлик кенгаши котиби Николай Патрушев учган самолётда олиб келинганини тахмин қилди. Хавфсизлик кенгаши аппаратида бу маълумот инкор қилинди. 

23 февраль куни Аргентина жандармерияси чемоданлар 96023 рақамли самолёт бортига ортилгани акс этган суратларни ўз ичига олган видеони тақдим этди. russianplanes.net сайти маълумотларига кўра, бу рақам "Россия" ёзги отряди фойдаланувчи Ил-96 самолётига тегишли, у давлатнинг биринчи даражали шахсларига хизмат кўрсатади. 

Президент ишлари бошқармасида уларнинг самолёти воқеага ҳеч қандай алоқаси йўқлиги, журналистлар ишончсиз маълумотлардан хулоса чиқаришгани айтилди. 

Тез орада russianplanes.net тўлиқ ўчириб қўйилди. Сайт эгаси уни шунчаки билмай ўчириб юборгани, бунда ҳеч кимни айбламоқчи эмаслигини айтган.