Туркия АҚШни «икки хил стандарт»ликда айблади

АҚШ Туркияга БМТ Хавфсизлик кенгашининг Сурия бўйича резолюциясини ўқиб чиқишни таклиф этиш билан икки хил стандартни намойиш этмоқда. Туркия бош вазири ўринбосари Бекир Бўздоғ шундай фикр билдирди. У АҚШнинг ўзига резолюцияни қайтадан ўқиб чиқишни маслаҳат қилган.

Бундан аввалроқ АҚШ Давлат департаменти вакили Ҳезер Науэрт «Туркия БМТ Хавфсизлик кенгашининг Сурия ҳудудида ўт очишни 30 кунга тўхтатиш ҳақидаги резолюциясини яна бир бор диққат билан ўқиб чиқиши кераклиги»ни айтганди. У бу орқали турклар Афринда ҳарбий ҳаракатларни давом эттираётганига ишора қилган.

«Биз ўқиб чиққанмиз. Уни (БМТ ХК резолюцияси) уларнинг (АҚШ) ўзи ўқиб чиқиши керак. У ерда Африн ҳақида сўз йўқ. БМТ Хавфсизлик кенгашининг бу қарори террорчиларга қарши амалиётларга тааллуқли эмаслиги айтилган, Туркия эса тинчликни таъминлаш учун террорчиларга қарши кураш олиб бормоқда. Террорчиларнинг ҳаммаси террорчи, уларни яхши ёки ёмонга ажратиш хато. АҚШ икки хил стандарт кўрсатмоқда, бунга индамай қараб туриб бўлмайди. «Зайтун новдаси» амалиёти вақтида тинч аҳоли вакиллари ҳалок бўлгани йўқ», деган вазир ўринбосари журналистларга.

У БМТ Хавфсизлик кенгаши резолюцияси Туркиянинг Африндаги ҳарбий амалиётларига таъсир кўрсатмаслигини таъкидлаган.

«Биз бу қарорни мамнуният билан қарши олдик. Бу қарор Шарқий Ғутадаги вазиятни барқарорлаштиришга қаратилган қарордир... АҚШ каби Туркия ҳам террорчиларни нишонга олган. Лекин АҚШ қарши курашмаётган террорчиларга қарши курашмаслик керак деган гапда мантиқ йўқ», дея қайд этган Бекир Бўздоғ.

Туркия Қуролли кучлари Бош штаби 20 январь куни Сурия шимолидаги Африн ҳудудидаги курд бўлинмаларига қарши «Зайтун новдаси» номли ҳарбий амалиётларни бошлади.

Расмий Дамашқ Туркиянинг Африндаги ҳаракатларини кескин норозилик билан қаршилаган ва бу ҳудуд Суриянинг ажралмас қисми эканини маълум қилган.