Тошкентда 8 қаватлик бизнес марказ қурилади

Фото: Somang Global

Кореянинг Somang Global компанияси шу йил ноябрь ойида Seoul Plaza бизнес марказини фойдаланишга топширишни режалаштирмоқда. Бу ҳақда компания вакили Чанг Ху На Ёшлар ижод саройида бўлиб ўтган Ўзбекистон-Корея бизнес форуми давомида маълум қилди, деб ёзмоқда Spot.

Саккиз қаватли бино «Ойбек» метро бекатига яқин ерда жойлашади. Ер остида автотураргоҳ ташкил этилади.

Офис хоналари маҳаллий ва халқаро компанияларга сотилади ҳамда ижарага берилади.

Бундан ташқари, Somang Global Тошкент шаҳрида «Сеул шаҳарчаси» турар-жой мажмуасини қурмоқда, у етти уйдан иборат бўлади.

Шунингдек, компания Ўзбекистонда меҳмонхоналар қуришни режалаштирмоқда.