Кичик Дональд Трамп ажрашмоқда

АҚШ президентининг катта ўғли ва унинг рафиқаси Ванесса 12 йиллик биргаликдаги ҳаётдан сўнг ажрашиш ҳақида эълон қилишди. Уларнинг эслатишича, «беш нафар ажойиб фарзандга эгалар», улар ҳақида қайғуриш «асосий устувор вазифа» бўлиб қолади.

New York Post’нинг кичик Трамп оиласига яқин манбаларга асосан ёзишича, Ванесса Трамп ажрашиш учун ҳужжатларни топширган. Нашр суҳбатдошларининг аниқлик киритишича, 40 ёшли Ванесса бу ҳужжатларни Нью-Йоркнинг Манҳэттен туманидаги судга юборган.

Ҳужжатларга кўра, Ванесса тезроқ ажрашиш ниятида. Шу билан бирга, у болалар устидан васийлик қилиш ҳуқуқи ва мулкни бўлиб олиш бўйича судлашиш ниятида эмас.

Манбалар сўзига кўра, жуфтлик сўнгги пайтларда қатор қийинчиликларга дуч келган. Кичик Трампнинг рафиқаси у сафарларда кўп бўлишидан норози бўлган.