Бугун Черногорияда президент сайловлари бўлиб ўтади

15 апрелда Черногорияда президент сайловлари бўлиб ўтади. Президент сайловларида мамлакатнинг энг машҳур сиёсатчиси 56 ёшли Мило Жуканович фаворит ҳисобланади. Мутахассисларнинг фикрича, сиёсатчи сайловларнинг 1-босқичидаёқ 50 фоиздан кўпроқ овоз тўплай олади.

Собиқ Югославия давлатлари ичидаги энг кичигида кўп партияли тизим киритилган 1990 йилдан кейин еттинчи марта президент танланади. 

Амалдаги президент Филип Вуянович мамлакатни 15 йил бошқаргандан сўнг ваколатларини топширмоқда. Черногорияда президент 5 йиллик муддатга сайланади ва бу лавозимни қаторасига 2 мартадан кўп эгаллай олмайди. Бироқ 2003 йилда биринчи марта президент этиб сайланган Вуянович билан вазият ўзгача бўлган. Черногория 2006 йилда Сербия ва Черногория иттифоқидан чиқиб, мустақиллигини эълон қилгандан кейин Вуянович мандати бошқатдан ҳисобланган.

15 апрелда мамлакатда 1,2 мингдан кўпроқ сайлов участкаси соат 7.00дан соат 20.00гача ишлайди. Охирги маълумотларга кўра, Черногорияда 532599 киши овоз бериш ҳуқуқига эга.

Президент лавозимига умумий ҳисобда 7 номзод даъвогарлик қилмоқда. Булар: Марко Милачич, Младен Боянич, Хазбия Калач, Василие Миличкович, Добрило Дедейич, Мило Жуканович ва ягона аёл номзод Драгиня Вуксанович.