«Асад дунёдаги энг аҳмоқ диктатор бўлиши мумкин»

Америкалик республикачи сенатор Рэнд Полнинг маълум қилишича, АҚШнинг Россияга нисбатан янги санкцияларини жорий этиш учун, Россия Суриянинг Дума шаҳрида юз берган кимёвий ҳужумга алоқадор эканини исботлаш талаб этилади. Бу ҳақда у CNN телеканалига берган интервьюсида айтиб ўтган.

«Менимча, санкциялар ҳақида гапиришдан аввал, биз Россия ҳужумда иштирок этганига оид қандай далиллар борлиги ҳақида гаплашиб олишимиз керак. Умуман олганда, кимёвий ҳужум ҳақида ўйлаб, бир нарса хаёлимга келди – Асад ёки дунёдаги энг аҳмоқ диктатор, ёки у буни қилмаган», - деди Пол.

Унинг таъкидлашича, Асад кимёвий ҳужумга алоқадор экани бўйича далилларни ҳеч ким кўрмади. Шунингдек Полнинг қайд этишича, кимёвий ҳужум – жаҳон ҳамжамиятини мамлакатга тўғридан тўғри зарба беришга ундаши мумкин бўлган ягона ҳодисадир. Шунинг учун сиёсатчининг билдиришича, сўнгги бир неча йил давомидаги урушда ғалаба қозонаётган Асадга сурияликларга қарши кимёвий қуролни қўллаш унча манфаатли иш бўлмаган.

Эслатиб ўтамиз, аввалроқ Россиянинг БМТдаги доимий вакили Василий Небензя Сурия президенти Башар Асадга қарши ҳарбий кучни қўллаш уни музокараларга мажбурлай олмаслигини айтиб ўтган эди.