Келажак озиқ-овқати: 10 йилдан кейин дунё аҳли нима тановул қилади

Келажакда сайёрамиз аҳолиси янада кўпаяди, озиқ-овқат эса камайиб боради. Шу сабабли олимлар ҳозирданоқ лабораторияларда янги маҳсулотларни яратишга уринмоқдалар. Келажакда одамлар ўзларига зиён етказмаган ҳолда қандай маҳсулотларни истеъмол қилишлари мумкин бўлади? 

Қуйида келажак озиқ-овқат маҳсулотлари ҳақида маълумотлар берилган.

Сунъий гўшт

2013 йилда лабораторияда етиштирилган гўштдан тайёрланган котлетали бургер 300 минг доллардан қимматроқ турган, ҳозир эса унинг нархи 10 доллардан сал ошади. Олимлар сунъий гўшт яна ҳам арзонроқ бўлиши ва уни жаҳон бозорига яқин ўн йилликда олиб чиқиш учун уни яратиш технологиясини такомиллаштириб бормоқдалар.

Гўштнинг лабораторияларда етиштирилиши услубларидан аксарияти қон зардобидан олинган ҳақиқий тирик ҳужайраларни қўллашни назарда тутади. Биореакторда ҳужайралардан мушаклар шакллантирилади, айнан шу мушаклар гўштга асос бўлади. 

Ишлаб чиқарувчиларнинг айтишича, сунъий гўшт бир қатор устунликлари туфайли талабгир маҳсулотга айланиши мумкин: у табиий гўштникидан ёмон бўлмаган таъмга эга ва арзон туради. 

Ўсимликлардан тайёрланадиган тухумлар

Бундай тухумлар ўсимлик компонентларидан тайёрланади ва бугунги кунда АҚШ супермаркетларида сотилмоқда. Бу тухумларни асосан вегетарианецлар истеъмол қилишади. Бундай тухумлар ишлаб чиқарувчиларининг таъкидлашича, улар ҳақиқий тухумлардан фойдалироқ ва мазалироқ.   

Бу антиқа маҳсулот фақатгина вегетариан озиқ-овқатни истеъмол қила оладиганлар учун қуймоқ тайёрлаш, пишириқ пишириш, майонез ва бошқа қайлаларда тухум ўрнини боса олади.

3D-принтерда босилган егулик

Бугунги кунда егуликларни нафақат қайнатиш ёки қовуриш, балки 3D-принтерда босиб чиқариш мумкин – ахир бу жуда тез, қулай ва антиқадир. Бундай ғоя анчадан бери мавжуд ва олимлар яқин келажакда бундай қурилмалар ҳар бир ошхонада пайдо бўлишини прогноз қилишмоқда.

Айни вақтда 3D-принтерда егулик босиш кўп вақт олмайди. Мисол учун, шоколадли десертни тайёрлаш учун 10 дақиқача вақт кетади.

Нафас орқали истеъмол қилинувчи егулик

Гарвард олими нафас олиш орқали истеъмол қилиш мумкин бўлган кофеин ва шоколадни яратиб, ўзининг маҳсулотлар қаторини чиқарди. Улар орасида AeroShot Pure Energy (кофеин + витамин В) ва Le Whif (нафас орқали истеъмол қилинувчи шоколад, калориясиз) каби маҳсулотлар бор.

Молекуляр егулик

Молекуляр ошхона бу ўзига хос пазандалик феномени бўлиб, маҳсулотларнинг молекуляр хусусиятлари ва ноёб технологияларни қўллаш ҳақидаги билимларга асосланган. Бундай ошхона ақлбовар қилмас таъмларни беради: ликопчада мевали желе турибди-ю, бироқ таъми худди қулупнайникидек.

Бош ошпазлар олимлар каби шприцлар билан ишлаб, экстремал ҳароратлар, мисол учун минус 196 даражадан фойдаланадилар. Бунда бодрингдан желе, зайтун мойидан кўпик тайёрлаш, томат сокини эса оқ рангга бўяш мумкин. Озиқ-овқатлар билан бундай “найранглар” уларнинг кимёвий текстураларига боғлиқ бўлади.