Кубада Кастролар даври тугамоқда

Куба Давлат кенгаши раисининг биринчи ўринбосари Мигель Диас-Канель мамлакат парламенти сессияси вақтида Давлат кенгаши раиси лавозими (давлат раҳбари) учун расман номзод сифатида кўрсатилди.

Кенгаш раиси биринчи ўринбосари лавозими учун эса Сальвадор Вальдес Меса номзоди кўрсатилган. Ушбу 57 ёшли сиёсатчи бир палатали парламентдаги овоз бериш жараёнида депутатлар томонидан тасдиқланса, Кубада 1959 йилдан буён Кастролар оиласи вакили бўлмаган илк етакчига айланади.

У айни вақтда 86 ёшга чиққан Рауль Кастрони алмаштириши кутилмоқда. Овоз бериш якунлари яқин вақтлар ичида эълон қилинади. Шундан сўнг, Кастро лавозимини топшириши керак.

Кубанинг ҳозирги раҳбари Рауль Кастро бир неча марта 2018 йилги сайловга ўз номзодини қўймаслигини маълум қилганди. У ўзининг издоши сифатида айнан Диас-Канелни кўрсатган.

Рауль Кастро Кубани 2008 йилнинг февралидан бошқаришга киришган. У бу лавозимни катта акаси, 1976 йилдан Куба раҳбари бўлган Фидель Кастродан қабул қилиб олганди.

Парламент сессиясида Давлат кенгаши раиси ўринбосарлари лавозимларига Рамиро Вальдес Менендес, Роберто Томас Моралес Охеда, Гладис Мария Бехерано Портела, Инес Мария Чапман ва Беатрис Томпсон Уррутия, Давлат кенгаши котиби лавозимига Омеро Акоста Альварес номзоди кўрсатилган.

Рамиро Вальдес - «кекса инқилобчилар» авлодидан кенгаш раиси ўринбосари лавозими учун ягона номзод.

Куба парламентида янги спикер сайланди. Сайловда ягона номзод бўлган Эстебан Ласо Эрнандес қайта сайланган. Бундан ташқари, депутатлар спикер ўринбосари Ана Мария Мари Мачадони қайта сайлашган.