Трамп Британияга ташриф буюришга қарор қилди – ОАВ

Фото: Luca Bruno/AP

АҚШ президенти Дональд Трамп яна Буюк Британияга амалий ташриф билан бориш ҳақида ўйлай бошлади, гарчи у аввал ушбу ғоядан воз кечганди. Бу ҳақда Daily Mail ўз манбаларига асосан ёзмоқда.

Газета маълумотларига кўра, Қўшма Штатлар етакчиси июль ойи ўрталарида ташриф билан келиш ва Британияда бир неча кун давомида қолишни мўлжалламоқда. Кутилишича, у бош вазир Тереза Мэй, шунингдек қиролича Елизавета II ёки қироллик оиласининг бошқа аъзоси билан учрашади.

Ташрифнинг аниқ муддати ҳали белгиланмади, бироқ Трамп 11 ва 12 июль кунлари Брюсселда бўлиб, НАТО саммитида қатнашади. Шундан сўнг у, катта эҳтимол билан, Лондонга жўнаб кетади.

Газетанинг эслатишича, Трамп Британияга ташриф борасида ўз фикрини бир неча марта ўзгартирган. Хусусан, январда у мамлакатга февраль ойига режалаштирилган ташрифини бекор қилганди.

Тайёрлаган: Отабек Матназаров

#Дональд Трамп #АҚШ #Буюк Британия