Бангкокда бокс бўйича ёшлар ўртасида Осиё чемпионатида кеча финалдаги барча жанглар якунига етди. Унда -56 кг вазн тоифасида юртимиз шарафини ҳимоя қилган Абдумалик Халаков таиландлик боксчини мағлуб этиб, Осиё чемпионига айланди.
Самандар Холмуродов (-52кг), Тимур Мержанов (-81кг), Жавоҳир Тоғаймуродов (-91кг) ва Жамшидбек Маҳмадалиев (+91кг) эса финалда кумуш медални қўлга киритди. Жаҳонгир Раҳмонов (-69кг) ва Наво Тамазов (-75кг) мусобақанинг бронза медали билан юртимизга қайтадиган бўлди.
Қизлар ўртасидаги жангларда Маҳлиё Раҳимова (-60кг) бронза медали соҳибасига айланди.
Шу тариқа, Ўзбекистон терма жамоаси ёшлар ўртасидаги Осиё чемпионатида 1та олтин, 4та кумуш ва 3та бронза медалларини қўлга киритди.