Туркия АҚШнинг таҳдидларига қарамай, С-400 бўйича битимни ёпганини маълум қилди

Туркия Россиядан С-400 зенит-ракета мажмуаларини сотиб олса, унга қарши санкциялар киритиш билан таҳдид қилаётган АҚШнинг позицияси Анқарага мақбул келмайди, деб айтди Туркия ташқи ишлар вазири Мавлут Човушғўлу. Унинг таъкидлашича, С-400’ни сотиб олиш бўйича битим поёнига етди, бироқ Туркияга қўшимча ҳаво ҳужумига қарши мудофаа тизимлари зарур ва шу сабабли у иттифоқдошларининг таклифларини кўриб чиқишга тайёр.

Туркия ҳукумати уни санкциялар билан қўрқитмасликни талаб қилмоқда, деб хабар берди Press TV.

“Агар сотиб олсангиз, биз санкциялар киритамиз” позицияси Туркияга таъсир қилмайди. Туркия бунга кўнмайди. Агар биз келгусида биргаликда нимадир қила олишимизни муҳокама қилсак, унда марҳамат, биз тайёрмиз”, деб айтган Човушғўлу. У бу ҳақда НАТО саммитида америкалик ҳамкасби Майк Помпео билан учрашувдан кейин айтган.

Номи маълум қилинмаган америкалик амалдорнинг таъкидлашича, Помпео Туркияни Россия мажмуалари ўрнига НАТО тизимларига эътибор қаратишга чақирган. АҚШнинг таъкидлашича, С-400 мажмуалари НАТО давлатларида қўлланувчи мажмуаларга мос келмайди.

Анқара 2017 йил декабрида С-400’ни сотиб олиш бўйича 2,5 млрд долларлик келишувни имзолаган. Човушғўлу С-400 бўйича битим ёпилганини ва Анқара иттифоқдошларидан қўшимча мажмуаларни сотиб олишни кўриб чиқишга тайёрлигини маълум қилган.

“Биз С-400 бўйича битимни ёпдик. Бу ҳал қилинган иш. Бизга кўпроқ мудофаа тизимлари зарур. Биз кейинги харидларни муҳокама қилишимиз мумкин”, деб айтган Човушғўлу.

НАТО бош котиби Йенс Столтенберг Россия мажмуаларининг харид қилиниши “Туркиянинг миллий қарори” эканлигини ва Вашингтонни Анқара билан мулоқотни қўллаб-қувватлашга чақирган.