«Реал»нинг рақиби ким бўлади? Иккинчи ярим финал ҳақида

Кечаги оғир вазндаги жангдан кейин бугун ўрта вазнли жамоалар ўртасида ярим финал ўйинлари бўлиб ўтади. «Рома» ва «Ливерпуль» мадридликларнинг қетма-кет учинчи ғалабасига ким тўсқин бўла олишига ойдинлик киритадилар.

«Рома»нинг «Барселона» устидан ғалабасидан сўнг, «Энфилд»даги 2:5 дан кейин ҳам мезбонларда имконият қолгани ҳақида кўпчилик гапирмоқда. Бу ҳолатга икки томонлама ёндошиш мумкин. Биринчидан, Клоппнинг гапи тўғри, «Ливерпуль» «Барселона» эмас, шу маънодаки, жамоа сўнгги 10 йилда илк маротаба ЕЧЛ ярим финалида ўйнамоқда ва рақибни менсимаслик, муддатидан олдин ўзига ортиқча баҳо бериб юбориш ҳолатлари бўлмайди. Бу «Рома»нинг вазифасини нисбатан янада қийинлаштиради.

Иккинчидан, энди «Рома» шунчаки, майдонга тушиш ва имкон туғилса, вазиятни ўзгартириш учун эмас, айнан ҳисобни тенглаштириш режаси билан ўйнайди. Чунки, «Барселона»га қарши ўйин римликларга ўзига ишонишни ўргатиб қўйди. Стадиондаги муҳит ҳам дастлабки дақиқалардан ўша чорак финалдагидан кўра кучлироқ бўлади. Бу энди, «Ливерпуль»га осон бўлмаслигини англатади. 

ЖАМОАЛАР ҲОЛАТИ
Кечаги рақиблар ҳақида сўз борганда, бундай рукн шарт эмасди, чунки «Бавария» учун ҳам, «Реал» учун ҳам ички чемпионатда ҳаммаси якунига етган, бор эътиборни Чемпионлар Лигасига қаратишганди. Бугунги жуфтлик мураббийлари учун эса, вазият бироз мушкулроқ, ҳар икки жамоа келаси мавсумда ЕЧЛ да қатнашиш ҳуқуқи учун аёвсиз жанг олиб бормоқда.

Бу нуқтаи назардан, «Ливерпуль»нинг кайфияти рақибига қараганда бироз ёмонроқ деб айтиш мумкин. Клопп жамоаси айнан ЕЧЛ ўйинлари олдидан бўлаётган турларда ички фронтда муваффақият қозона олмади. «Вест Бромвич», «Эвертон» ва «Сток Сити» билан дуранглар натижасида ҳозирда «Ливерпуль» ўзини тўлиқ хавфсиз ҳис қила олмайди. Якшанба куни ливерпулликлар «Челси» майдонига сафар қилишини ҳам таъкидлаш керак.
 
«Рома» эса, аксинча, айнан сўнгги турлардаги ғалабалари ва «Интер»нинг мағлубияти туфайли, кучли тўртлик учун яхши имконият ҳосил қилиб олди. «Рома» қолган турларда бир марта мағлубиятга учрашга ҳаққи бор энди. Шанба кунги ўйинда «Рома» Кьево» устидан йирик – 4:1 ҳисобида ғалаба қозонди. Эдин Жеко икки гол урган бўлса, Шик ва Эл-Шааравилар биттадан голни ўз ҳисобларига ёзиб қўйишди. Худди шу ҳисоб бугунги ўйинда ҳам «Рома»ни қониқтиради. 

ТАРКИБЛАР
Таркиблардаги йўқотишлар келсак, ўтган ўйинда жароҳат олган «Рома» ярим ҳимоячилари Кевин Стротман ва Диего Пероттилар жавоб ўйинига тикланиб улгурмадилар ва мураббий уларни учрашув заявкасига киритмади. Яъни бу ўйинчиларнинг бугун майдонга тушмасликлари аниқ.

«Биз уни қамоққа кетган эрини кутадиган вафодор аёл каби кутамиз» – деди Юрген Клопп дастлабки ўйинда жароҳатланиб, нафақат мавсум охиригача, балки Россиядаги жаҳон чемпионатини ҳам ўтказиб юборадиган Окслейд Чемберлен ҳақида. Эмре Жаннинг ҳам аввалроқ сафдан чиққанини эътиборга олсак, «Ливерпуль»нинг бугунги ўйиндаги ярим ҳимоясини бемалол тахмин қилиш мумкин – Вейналдум, Ҳендерсон ва Жеймс Милнер.

Мавсум бошида жамоанинг трансфер бозорида фаол эмаслигидан норози бўлган мухлисларга қарата Клопп қизиқ гап айтганди. Қанот ҳимоясига янги футболчи сотиб олаётганига шаъма қилиб, биз энди ярим ҳимояда Милнерга эга бўламиз, демак янги ажойиб  ярим ҳимоячи сотиб олдик, десак бўлади, деб ҳазиллашганди. Чунки ўтган мавсумда Милнер асосан чап қанот ҳимоясида тўп сурган. Хуллас, Милнер бугунги «Ливерпуль» ярим ҳимоясида асосий фигура эканини яна бир бор исботлаши керак. Бир ЕЧЛ мавсумида 8 голли пас билан рекорд қўйган футболчи энди «Рома»нинг босимини қайтаришда жонбозлик қилишига тўғри келади.

«Ливерпуль» таркибида яна ҳимоячилар Матип ва Гомеслар ҳам жароҳатланганлар сафида эканини таъкидлаш мумкин.

Чемпионлар Лигаси расмий сайтига кўра, жамоаларнинг қуйидаги таркиби тахмин қилинмоқда: 

РОМА: Алиссон; Флоренци, Манолас, Фасио, Коларов; Наингголан, Де Росси, Пеллегрини; Шик, Джеко, Эл-Шаарави.

ЛИВЕРПУЛЬ: Кариус; Александер-Арнолд, Ловрен, ван Дейк, Робертсон; Вейналдум, Хендерсон, Милнер; Салах, Фирмино, Мане.

ҚИЗИҚАРЛИ ДУЭЛЛАР:
Бир-бирига ташқи томондан ҳам ўхшаш бўлган икки мураббийдан ташқари, майдонда ҳам бир қатор қизиқарли қарама-қаршиликларнинг гувоҳи бўлишимиз мумкин. 
Муҳаммад Салоҳ бу йил ажойиб мавсумни ўтказмоқда ва деярли ҳар бир ўйинда майдонни голсиз тарк этмаяпти. Бу сафар унга римликлар дарвозабони Алисcон Бекер қаршилик қилади. Бразилиялик дарвозабон ушбу мавсумда Европанинг энг яхши дарвозабонларидан бирига айланди ва баъзи хабарларда уни айнан «Ливерпуль» ўз сафига қўшиб олмоқчи экани ҳақида ёзишмоқда. Эътиборли факт, Алисcон чемпионлар лигасида ўз майдонидаги ўйинларда ҳали бирор марта ҳам гол ўтказиб юбормади. Римга «Атлетико», «Челси» ва « Барселона» каби топ клубларнинг мехмон бўлганликларини ҳисобга олсак, бу жуда ажойиб кўрсаткич.

Яна бир қизиқарли қарама қаршилик нариги жарима майдончасида кузатилади. Эдин Джеко ўз вақтида Англия Премьер Лигасида ҳам тўп сурган, юқори қаватлардаги курашларда беназир ҳаракат қила олади. Айниқса, Чемпионлар Лигасида у жуда самарали ҳаракат қиляпти, хусусан, «Барселона»га қарши ўйинда айнан унинг фаоллиги натижасида дастлабки икки гол урилганди. Катта эҳтимол билан, Юрген Клопп рақибнинг энг хавфли ҳужумчисини тўхтатиш вазифасини Виржийл ван Дейкка юкласа керак. Бундай дуэлларда Ловреннинг кўп бора панд берганини кузатганмиз. Дунёнинг энг қиммат ҳимоячиси Эдин Джеконинг ЕЧЛ даги юришини тўхтатиб қола оладими?

ЭЪТИБОРЛИ ФАКТ
•  «Рома» ўз тарихида фақат бир марта Чемпионлар кубоги финалига чиққан. 1984 йилда римликлар айнан «Ливерпуль»га қарши финалда ўйнашган ва учрашув (1:1) пенальтилар сериясида инглизларнинг ғалабаси билан якунланганди. 

ЎЙИН ОЛДИДАН
Эусебио Де Франческо: 
«Мотивация жиҳатидан «Барселона»га қарши ўйинга нисбатан ҳеч нарса ўзгармади. Биз ҳисобни тенглаштириш ва яна бир буюк ғалабани амалга оширишга уриниб кўрамиз. «Ливерпуль» жуда хавфли рақиб, озгина имконият берсанг, жазолашни жуда яхши билади. Аммо бир жамоа ўз майдонида, ЕЧЛ ярим финалида ва етмиш минг томошабин кўз ўнгида олдиндан тақдирда тан беришига ишонасизми? Йўқ, биз охиригача курашмоқчимиз. Агар кўп гол урмоқчи бўлсак, олдинга боришимиз керак – албатта, бундай пайтда ҳимоя кучсизланади, буни ҳам эътиборга оламиз. Муҳаммад Салоҳ - жуда кучли футболчи, айниқса узун паслар билан ўйнаганда, хавф туғдиради, лекин биз уни қўриқлаш учун уч футболчини жалб эта олмаймиз, тўғрими? Биз рақибнинг устунликлари ҳақида ўйлаш билан бирга, ўзимизнинг мақсадимизни унутмаслигимиз керак»

Юрген Клопп:
«Ростдан ҳам «Олимпико»нинг ўз сеҳри борми, синаб кўрамиз. «Рома» яна бир бор жасорат кўрсатиши мумкин эмас, деб айтмайман, албатта. Лекин биз «Челси» ёки «Барселона» ҳам эмасмиз. Биз ҳам ўз майдонимизда кучлимиз, «Спартак»ни 7:0 ҳисобида ютгандик, масалан, лекин нима бўпти? Биз бошқача ўйнаймиз ва бу ўйинга тайёрмиз, деб айта оламан. Жавоб ўйинига уч тўп фарқ билан келамиз деб ўйламагандим, лекин жуда ҳам идеал ҳолат деб айта олмайман. Агар бизни финалчи деб эълон қилишса, ана унда идеал бўларди, лекин бизни яна бир ўйин кутиб турибди. Ўйнаш керак. «Рома» ўз майдонида бирорта ҳам гол ўтказмаган, биз эса ҳали мағлубиятга учрамадик. Бу нима дегани? Бу сериялар ўз ҳолича қолса, биз кейинги босқичга чиқамиз».

Қаҳрамон Асланов тайёрлади.