Интрига интригалигича қолмоқда: Жээнбеков Атамбоев билан учрашадими?

 Илгарироқ Қирғизистон социал-демократик партиясининг айрим аъзолари ўзларининг етакчиси Алмазбек Атамбоев мамлакат президенти Сооронбай Жээнбеков билан учрашишга тайёр эканлигини маълум қилишган эди. Социал-демократлар вазиятни юмшатиш учун ўз раисларига учрашув томон қадам ташлашни таклиф қилишган.

Қирғизистоннинг «24.kg» ахборот агентлиги давлат раҳбари матбуот котибидан Сооронбай Жээнбековнинг бу масалада позицияси қандай эканлиги, бундай учрашувни ташкил этиш мумкин ё йўқлиги, агар мумкин бўлса у қачон бўлиб ўтиши ҳақида сўрашган.

«Қонунга кўра, Қирғизистон президенти ўз ишини партия фаолиятидан ташқарида олиб боради. Айни пайтда президент ички ва ташқи сиёсат масалалари билан банд. Саволларингизга келсак, эслатиб ўтаман: Сооронбай Шариповичнинг Алмазбек Шаршенович билан азалий шахсий муносбатлар боғлаб туради, улар узоқ йиллардан буён партиядош ҳисобланади. Бироқ президент ўзининг шахсий муносабатларига изоҳ бермайди», — деган Жээнбековнинг матбуот котиби Тўлғўной Стамалиева.

Эслатиб ўтамиз, икки қалин дўст ўртасида совуқлашув мамлакат экс-президентининг ҚСДП қурултойи якунланганидан кейинги танқидлари туфайли пайдо бўлган эди. Алмазбек Атамбоев айрим пайтлари Сооронбай Жээнбеков билан кескин оҳангда гаплашишини тан олиб, Хавфсизлик кенгашида давлат раҳбарига бошқа нутқни беришганини таъкидлаган ҳамда дўстини Асқар Акаев ва Қурмонбек Бакиев хатоларини такрорлашдан қайтарган.