АҚШ Венесуэлага қарши чоралар кўрмоқчи

АҚШ Венесуэлада демократияни тиклаш учун бу давлатга нисбатан дипломатик ва иқтисодий чоралар жорий қилмоқчи. Бу ҳақда АҚШ давлат котиби Майкл Помпеонинг Венесуэлада ўтган президент сайловлари билан боғлиқ баёнотида айтилган.

Помпео сайловларни “сохталаштирилган” деб таърифлаган ва Вашингтон унинг ўтказилишини қоралашини айтган. “Бу гўёки сайловлар деб аталувчи жараён конституциявий тартибга ҳужум ва Венесуэланинг демократик анъаналарининг ҳақоратланишидир”, деб айтган Помпео. Унинг айтишича, “Мадуронинг тузуми ҳалол, шаффоф ва эркин сайловлар орқали демократия йўлига турмас экан, унинг ҳукумати халқаро ҳамжамиятдан яккаланган ҳолда бўлади”.

Венесуэлада 20 май куни ўтган сайловларда амалдаги президент Николас Мадуро 5,8 млндан кўпроқ овоз билан ғолиб бўлди. Унинг асосий рақиби Энри Фальконга 1,8 млнта овоз берилган. 

Овоз бериш натижалари эълон қилинишидан олдиноқ Фалькон уларни тан олишдан бош тортган ва ҳукуматни сайловчилар овозларини сотиб олишда айблаган.