Олий Мажлисда илк марта инсон ҳуқуқлари бўйича ҳисобот тингланади

БМТнинг Инсон ҳуқуқлари бўйича Универсал даврий кенгашида Учинчи миллий ҳисоботни тақдим этган Ўзбекистон делегацияси Олий Мажлисда ўз иши ҳақида ҳисобот беради.

7-18 май кунларида БМТнинг Инсон ҳуқуқлари бўйича кенгаши универсал даврий таҳлилга (УДТ) оид Ишчи гуруҳининг 30-сессияси ўтказилган, 9 май куни Ўзбекистон делегацияси инсон ҳуқуқлари бўйича ҳисоботни тақдим этганди.

«Делегация аъзолари депутатларга бизнинг ҳисоботимиз муҳокамаси қандай кечгани ҳақида гапириб беришади», дея Инсон ҳуқуқлари бўйича миллий марказ директори Акмал Саидовнинг сўзларини келтирмоқда «Kun.uz» мухбири. Парламентарийлар ҳисобот билан июнь ойида танишиши кутилмоқда.

Женевадаги йиғилишда Ўзбекистонга 212та тавсия берилган. Уларнинг аксар қисми Ўзбекистон томонидан қабул қилинган.

«Ўтган сафар биз бунчалик кўп тавсияларни қабул қилмагандик, бу сафар – 200дан ортиғини», – дея қайд этган Саидов.

Эндиликда, унинг сўзларига кўра, парламент нафақат халқаро келишувларни ратификация қилади, балки инсон ҳуқуқлари соҳасидаги халқаро мажбуриятларга мамлакатда амал қилинишини ҳам назорат қилади.

«Парламент энди фақат ратификация қилиш билан кифояланмайди, у Ўзбекистоннинг инсон ҳуқуқлари соҳасидаги халқаро мажбуриятларига қай тариқа амал қилинаётганини назорат қилади. Бу БМТнинг Инсон ҳуқуқлари бўйича Универсал даврий кенгашида ва Халқаро парламент иттифоқида юқори баҳоланади», – деган Саидов.

У хорижий делегациялар Ўзбекистонда олиб борилаётган ислоҳотлардан бохабар этилганини қайд этиб ўтган.

«Шу руҳда давом этиш керак, ислоҳотларни давом эттириш, халқаро ҳамкорлар билан янада яқиндан ишлаш керак», – деган Саидов.