Сингапур АҚШ президенти Дональд Трамп ва КХДР етакчиси Ким Чен Иннинг 12 июнь кунига режалаштирилган шахсий учрашуви бекор қилинганидан афсусда эканини билдирди. Бу ҳақда мамлакат ТИВ расмий баёнотида айтилади.
«Сингапур АҚШ президенти Дональд Трамп ва КХДР Давлат кенгаши раиси Ким Чен Иннинг режалаштирилган учрашуви 2018 йил 12 июнь куни ўтказилмаслигидан афсусда. Сингапур Корея ярим оролида тинчлик ва барқарорликка эришиш бўйича йўналтирилган саъй-ҳаракатлар ҳамда мулоқот давом эттирилишига умид қилади», - дейилади баёнотда.
Аввалроқ, Трамп твиттердаги саҳифасида Ким Чен Ин билан учрашувни бекор қилишга мажбур бўлгани ҳақида ёзганди. Оқ уй расмий позициясига кўра, Шимолий Корея ҳукумати музокаралар ўтказишни хоҳласа, сиёсий баёнотларини сал юмшатиши керак.
КХДР эса АҚШ билан муносабатларни ҳамон яхшилаш тарафдори экани ва Америка расмийлари билан учрашувни исталган вақтда ҳамда исталган шаклда ўтказишга тайёрлигини билдирди.
