Испанияда Роналдунинг кетмоқчилиги сабабини маълум қилишди

«Реал» ҳужумчиси Криштиану Роналду мадридликлар раҳбарияти томонидан ўзига берилган янги шартнома шартларидан қониқиш ҳосил қилмаган. Бу ҳақда AS хабар тарқатмоқда.

Нашр маълумотига кўра, клуб президенти Флорентино Перес португалиялик футболчига ўтган мавсумда ЕЧЛ финалида «Ювентус» устидан қозонилган 4:1 ҳисобидаги ғалабадан кейин шартномани янгилашни ваъда қилганди. 2017 йил декабрида, клублар ўртасидаги жаҳон чемпионати вақтида музокаралар бошланди. «Реал» футболчига янги шартномага кўра йилига 9 миллион евро қўшиб берган, аммо бунинг эвазига маълум бир шартлар қўйилган, футболчи жамоа билан совринлар ютиши, «Олтин тўп» мукофотини ва бошқа шахсий совринларни қўлга киритиши, шулар жумласидан. Криштиану эса бу шартномани рад қилган ва клуб раҳбариятини ўзига ҳурматсизлик қилди, деб ҳисоблаган.

Шундан сўнг, ўзаро муносабатлар совуқлашиб борган. Бунинг устига, «Реал» президенти португалиялик футболчи ўзининг бешинчи «Олтин тўп»ини олган кечада бразилиялик футболчи Неймар шаънига мақтовли сўзлар айтганидан жаҳли чиққан.

Роналдуга таклиф этилган шартномага кўра, футболчининг йиллик маоши 30-33 миллион еврога етиши мумкин эди (ҳафтасига 350 минг евро). Аммо бу вақтда «Барселона» футболчиси Лионель Месси ҳафтасига 750 минг (йилига 50 миллион еврога яқин), «ПСЖ» ҳужумчиси Неймар эса ҳафтасига 600 минг евро ишлаши (йилига 37 миллион евро), Роналдунинг ҳасадини келтирган.

Охирги ойлардаги бу воқеалар Криштиану Чемпионлар лигаси финалида «Ливерпуль»га қарши кечган ва 3:1 ҳисобидаги ғалаба билан якунланган учрашувдан кейин клубдан кетиш ҳақида айтишига олиб келган.

Финал ҳуштаги янграши билан берган илк интервьюсида Роналду тез орада «Реал»дан кетиши мумкинлигига ишора қилди: «Келажагим ҳақида кейинроқ айтаман. Мен «Реал»да яхши вақтлар ўтказдим, аниқ қароримни яқин кунларда маълум қиламан».
 
У шунингдек, клуб президентига ҳам мурожаат қилган: «Гап пулда эмас. Мен 5 марта ЕЧЛ ғолиби бўлдим, 5 марта «Олтин тўп» қўлга киритдим, номимни тарихга муҳрлаб қўйганман. Яширмайман, кейинги мавсумда ҳам «Реал»да бўлишим аниқ эмас. Аниғини шу ҳафтада эълон қиламан, барчасини айтаман. Флорентино, ҳаёт бу қуруқ мақтовга бурканиб яшаш эмаску, тўғрими?».

Роналду «Реал» сафида 2009 йилдан буён тўп суриб келмоқда. У бу клубга «Манчестер Юнайтед»дан 93,4 миллион евро эвазига трансфер қилинган ва ўша вақтда дунёдаги энг қимматбаҳо футболчига айланган. «Реал» сафида у 4 марта Чемпионлар Лигаси ғолиби бўлди, икки мартадан Испания чемпионатида ва Испания Кубогида ғолиб чиқди, 3 марта клублар ўртасида жаҳон чемпионати совринини боши узра кўтарди. У «МЮ» сафида ҳам 3 марта Англия чемпиони бўлган ва бир марта ЕЧЛда, бир марта Англия Кубогида ва клублар ўртасидаги жаҳон чемпионатида ғолиб чиққан.