Давлат туризм қўмитасига янги раис тайинланди

Бахтиёр Умаров Туризмни ривожлантириш давлат қўмитаси раиси этиб тайинланди. Бу ҳақда Kun.uz’нинг ҳукуматдаги манбаси хабар берди.

Бахтиёр Нурутдинович Умаров бунга қадар Инновацион ривожланиш вазирлиги раҳбари Иброҳим Абдураҳмоновнинг биринчи ўринбосари вазифасини бажарувчи сифатида ишлаб келган.

Қўмита раисининг вазифалари қуйидагилардан иборат: фаолиятини ялпи бошқариш ва Қўмита олдига қўйилган барча топшириқ ва вазифаларни ижроси юзасидан шахсан жавобгарликни ўз зиммасига олади;

умумий белгиланган штат миқдоридан оширмаган ҳолда, Қўмита марказий аппарати ва ҳудудий бошқармаларнинг штат жадвалини ҳамда марказий аппарат, ҳудудий бошқармалар ва Қўмита қошидаги ташкилотларнинг харажатлари миқдорини тасдиқлайди;

қўмита марказий аппарати ҳамда ҳудудий бошқармаларнинг тузилиш тартиби ва бўлимлари ҳақидаги низомни тасдиқлайди, Қўмита қошидаги ташкилотларнинг Уставини тасдиқлайди;

ўрнатилган тартибда Қўмита марказий аппарати, ҳудудий бошқармалар ҳамда Қўмита қошидаги ташкилотларнинг ходимларини ишга тайинлайди ва ишдан бўшатади;

Ўзбекистон республикаси Ташқи ишлар вазирлигига юртимизнинг чет элдаги дипломатик ваколатхоналаридаги туризмни ривожлантириш масалалари бўйича маслаҳатчиларни тайинлаш ва ишдан вазифасидан озод этиш юзасидан таклифларини киритади;

қўмита ваколати доирасидаги масалалар бўйича зарур ҳужжатларни қабул қилиш, раиснинг биринчи ўринбосари ва раис ўринбосари, Қўмитанинг бошқа ходимлари, ҳудудий бошқармалар ва ташкилотлари ходимлари ваколати, вазифалари ва жавобгарлик даражасини белгилайди;

қўмитанинг бошқа ходимлари, ҳудудий бошқармалар ва ташкилотлари ходимлари томонидан бажарилиши шарт бўлган вазифалар юзасидан буйруқ ва кўрсатмалар беради.

Эслатиб ўтамиз, аввалроқ Туризмни ривожлантириш давлат қўмитаси раиси сифатида ишлаб келган Азиз Абдуҳакимов Ўзбекистон Республикаси бош вазирининг ўринбосари этиб тайинлангани хабар берилганди.