АҚШ Эронга қарши санкциялар тобора ортиб боришини маълум қилди 

Агар Эрон ўзини тутишни ўзгартирмаса, унда Вашингтоннинг Теҳронга қарши санкциялари тобора ортиб боради. Бу ҳақда АҚШ молия вазири ўринбосари Сигал Манделкер маълум қилди. 

Эронда ядровий келишув доирасида уранни бойитиш қувватлари оширилмоқчи.

“Агар тузум ўз йўналишини ўзгартирмаса, бизнинг санкциялар таъсири тобора ортиб боради ва оғриқлироқ бўлади”, деб айтган Манделкер.

Манделкер АҚШнинг барча ҳамкорларини бирлашиб, Эронга қарши янги санкцияларга қўшилишга чақирган.

Манделкернинг қўшимча қилишича, Эрон авиакомпаниялари мунтазам равишда Сурияга жангарилар ва қурол ташийди. 

“Санкциялар остига тушган Mahan Airlines ва Caspian Air, Pouya Air каби бошқа авиакомпаниялар Сурияда уруш бошлангандан бери у ерга жангарилар ва материаллар ташийди”, деб айтган Манделкер.

“Эрон тижорат компаниялари “Қудс” амалиётларида, қурол ташиш, хорижий террорчилик амалиётларини молиялаштиришда муҳим роль ўйнайди”, деб айтган АҚШ вакили ва бунга амин бўлиш учун айтиб ўтилган авиакомпаниялар сайтларини кўздан кечириб, уларнинг парвозларини таҳлил қилиб чиқишни таклиф қилган.

“Келинг очиқчасига айтамиз, бизнинг ҳамкорлар Mahan Airlines бўйича исботлар келтиришимизни сўрашганда, биз агар улар мунтазам равишда жангарилар ва товарларни ташаётган бўлса яна қандай исботлар керак, деган савол билан юзланамиз. Одамлар Сурияга таътилга бормайдилар”, деб қўшимча қилган Манделкер.

У европалик ҳамкорларни санкциялар остига тушмаслик учун бу авиакомпаниялар билан эҳтиёткорроқ ҳамкорлик қилишдан огоҳлантирган.