Ўзбекистон инновацион ривожланиш бўйича топ-50 давлат орасига кирмоқчи

Ўзбекистон The Global Innovation Index жаҳоннинг энг инновацион мамлакатлари топ-50 рўйхатига кириш ниятида. Инновацион ривожланиш вазирлиги экспертлар жамоаси билан биргаликда ушбу мақсадга эришиш учун устувор йўналишларни белгилайди, дея хабар беради Kun.uz мухбири.

Хусусий сектор вакиллари ва вазирдан иборат экспертлик-таҳлил гуруҳи ҳозирги вақтда Ўзбекистон инновацион ривожланишининг қисқа ва узоқ муддатли сценарийларини ишлаб чиқмоқда.
 
Экспертларнинг фикрига кўра, мамлакатнинг инновацион салоҳиятидан фойдаланилмаган, бу Глобал инновацион индексидаги ёмон кўрсаткичларга олиб келган.
 
2015 йилда Ўзбекистон рейтингда 122-ўринни эгаллади. Таққослаш учун, унинг яқин қўшнилари - Қозоғистон ва Қирғизистон мос равишда 82- ҳамда 109-поғонани эгаллади. Ўтган йили Ўзбекистон рейтингда умуман тақдим этилмади.

«Афсуски, бу индексдаги бизнинг позициямиз қониқарсиз. 2015 йилда Ўзбекистон 122-ўринни эгаллаган... Рейтингнинг топ-50 давлатлари рўйхатига киришни мақсад қилганмиз, деб ўйлайлик, лекин унинг барча кўрсаткичлари бўйича кўтарилиб бўлмайди. Албатта, биз биринчи ўринга ҳаракат қилишимиз керак, аммо ресурсларимиз чекланган», - деган инновацион ривожланиш вазири ўринбосари Шерзод Шерматов.