Хитой ҳукумати «Самовий тармоқ» номли махсус аксилкоррупцион кампания доирасида дунёнинг 90дан ортиқ мамлакатидан 4 мингдан ортиқ жиноятчини қўлга олиб, ортга қайтарди. Бу ҳақда Хитой Компартиясининг тартиб-интизом бўйича марказий комиссияси баёнотида келтирилган.
Ҳужжатга кўра, шу йилнинг апрель ойи охирига қадар мамлакатга 4141 нафар жиноятчи қайтарилган, шундан 835 нафари собиқ давлат хизматчиларидир. Бундан ташқари, расмий Пекин мамлакатдан ноқонуний йўл билан олиб чиқиб кетилган 10 миллиард юандан ортиқ маблағни (1,58 миллиард доллар) ортга қайтаришга муваффақ бўлган.
2015 йил апрель ойида Хитой хорижга қочган коррупция билан боғланган мансабдор шахслар ва Коммунистик партия аъзоларини тутиш бўйича «Самовий тармоқ» номи остидаги кампанияни бошлаганди. Хитой ҳукумати Интерполга коррупцияда гумон қилинаётган энг кўп қидирилаётган 100 киши номини тақдим этди. Интерпол ушбу шахсларга нисбатан «қизил огоҳлантиришлар» эълон қилди. Бундай ҳужжат ташкилотга аъзо давлатларнинг ҳуқуқ-тартибот органларидан жиноятчини топиб, уни экстрадиция қилишни талаб этади.
Ҳозирга қадар рўйхатдагиларнинг 52 нафари ушланган.
Шу йилнинг апрелида Хитой ҳукумати қочоқ коррупционерларни қидириш ва уларни ҳамда активларини мамлакатга қайтаришга қаратилган «Самовий тармоқ-2018» кампаниясини бошлади.
