Андижонда касб-ҳунар коллежлари битирувчилари  учун тантанали тадбир ўтказилди

Андижон вилоятида жорий ўқув йили якунига кўра, 117 та касб-ҳунар коллежларини 39 минг 265 нафар йигит-қизлар тамомлаб, келгуси ҳаёт жараёнлари сари қадам қўймоқда.

Заҳириддин Муҳаммад Бобур номли вилоят мусиқали ва драма театрида мазкур ўқув даргоҳларининг иқтидорли битирувчиларига диплом топшириш маросими бўлиб ўтди. Унда турли ташкилотлар ва жамоатчилик вакиллари, битирувчиларнинг ота-оналари иштирок этдилар.

Тадбир аввалида сўз олган вилоят ҳокими ўринбосари Манзурахон Юнусова, вилоят ўрта махсус касб-ҳунар таълими бошқармаси бошлиғи Фурқатбек Бузруковлар ёшларга ўз тилакларини билдирилар. Ўқув жараёни ва жамоат ишларида фаол бўлган бир қатор битирувчилар ва уларнинг устозлари рағбатлантирилди.

Ўз ўрнида ўқувчиларнинг ота-оналари ҳам сўз олиб, мураббий ва педагогларга миннатдорчилик билдиришди. Шундан сўнг вилоятдаги барча коллежлардан келган иқтидорли битирувчиларга қизил дипломлар тантанали тарзда тарзда топширилди.

Андижон санъат коллежи тарбияланувчилари томонидан тайёрланган байрам дастури тадбирга якун ясади.

   Элмурод Эрматов, Андижон

KUN.UZ мухбири