Тошкент–Андижон ва Тошкент–Термиз йўналишларида юқори тезликдаги поездлар қатнови режа қилинмоқда

10 июн куни Корея Республикасида “Ўзбекистон темир йўллари” АЖ бош муҳандиси Шарофиддин Қодиров, Транспорт вазирлиги бўлим бошлиғи Анвар Душаев ва Hyundai Rotem компанияси президенти Ли Ёнг Бае ўртасида учрашув бўлиб ўтди.

Учрашувда “Ўзбекистон темир йўллари” АЖ учун ишлаб чиқарилаётган “Жалолиддин Мангуберди” юқори тезликда ҳаракатланувчи электропоездларини етказиб бериш лойиҳасининг белгиланган муддатларда амалга оширилиши юзасидан маълумот алмашилди.

Шунингдек, Тошкент–Андижон ва Тошкент–Термиз йўналишларида юқори тезликдаги поездлар ҳаракатини ташкил этиш мақсадида 8 та замонавий юқори тезликда ҳаракатланувчи электропоездларни етказиб бериш лойиҳаси юзасидан техник шартларни якуний келишиш билан боғлиқ масалалар кўриб чиқилди.

Вазирлик хабарига кўра, учрашув якунида томонлар қўшма лойиҳаларни самарали амалга ошириш бўйича саъй-ҳаракатларни давом эттиришга келишиб олган.

Пойтахтдан Андижон ва Термизга юқори тезликдаги поездлар қатновини йўлга қўйиш лойиҳаси ҳақида июн ойи бошида транспорт вазири Илҳом Маҳкамов парламентдаги чиқишида айтиб ўтганди.

“Ҳозирги Тошкент–Андижон ҳамда Тошкент–Термиз йўналишларидаги темирйўл линияларини қайта модернизация қилиш ва бу йўналишларга Hyundai Rotem компанияси томонидан ишлаб чиқарилган саккизта тезюрар электропоездларни қатновга йўлга қўйиш масаласи кўриб чиқилмоқда. Тошкент–Андижон ва Тошкент–Термиз йўналишлари тоғли ҳудудлардан иборат бўлгани учун, переваллардан ҳаракатланадиган махсус агрегат таркиблари олиб келинади”, – деганди вазир.

Эслатиб ўтамиз, Hyundai Rotem ва “Ўзбекистон темир йўллари” ўртасида 2024 йилда имзоланган шартномага асосан, корейс компанияси 6 та “Жалолиддин Мангуберди” поездлари (жами 42 та вагон)ни етказиб бериши ва уларга техник хизмат кўрсатишига келишилган. 2026 йилнинг ўтган даврида бу поездлардан иккитаси келтирилиб, Тошкент–Хива йўналишида синов тариқасида қатнай бошлади.

Мазкур 6 та таркибга доир келишувнинг умумий қиймати 220,03 млн еврога баҳоланган. Бунинг учун Корея Эксимбанки 185,18 млн евро эквивалентидаги қарз маблағини корея вонида 40 йил муддатга, шу жумладан 10 йиллик имтиёзли давр билан ажратишига келишилган.