Эрон нефть экспорти учун Ормуз бўғозини ёпиш билан таҳдид қилди

Эроннинг Ислом инқилоби қўриқчилари корпуси бошқа давлатларга нефть экспорти учун Ормуз бўғозини ёпишга тайёр. Бу ҳақда корпус вакили Исмоил Ковсарий маълум қилди. 

“Агар Эрон нефти экспорти ушлаб турилса, биз Ормуз бўғози орқали бошқа давлатларга нефть олиб чиқилишига йўл бермаймиз”, деб айтган Ковсарий YJC агентлигига ва ушбу ҳудуд орқали дунё нефтининг 20 фоизи ўтишини таъкидлаб ўтган.

Ўтган ҳафтада АҚШ давлат департаменти вакили Вашингтон иттифоқдошларини ноябргача Эрондан нефть олишни тўлиқ тўхтатишга кўндириб кўришини айтган. Унинг айтишича, бундай муҳокамалар бошқа давлатлар, жумладан Хитой билан олиб борилмоқда.

3 июлда Эрон президенти Ҳасан Руҳоний АҚШнинг Эрон нефти экспортини тўхтатишга интилишини “амалга ошириб бўлмас”, деб ҳисоблашини айтган. 

“Фикримча, баъзи америкалик амалдорларнинг Эрон нефти экспортини тўлиқ тўхтатиш истаги ҳеч қачон амалга ошмайдиган сафсатадир”, деб айтган Руҳоний.

Руҳоний Эронда нефтни зарур миқдорда сотишга имкон берувчи дастур борлигини айтган. Эрон президенти АҚШнинг бу соҳадаги фаолияти бир томонлама характерга эгалигини ҳамда энергетика ва савдо соҳасидаги халқаро меъёрларни бузишини айтган.