Ривалдо Неймарни қўллаб-қувватлади ва «йиқилишда давом этиш»га чақирди

Бразилия терма жамоасининг собиқ футболчиси Ривалдо терма жамоа ҳужумчиси Неймарни қўллаб қувватлаб, уни ўйинлар вақтида «майдонга қулашда давом этиш»га чақирди. У бу ҳақда инстаграмдаги саҳифасида ёзиб қолдирган.

«Ҳамиша қандай ўйнаб келган бўлсанг, шундай ўйнашда давом эт ва бошқа мамлакатдан бўлган футболчиларнинг танқидларига эътибор қаратма. Уларнинг кўпчилиги жаҳон чемпионатини тарк этиб бўлишди. Майдонда рақибни алдаб ўтишинг керак бўлганида алдаб ўт. Гол уришинг керак бўлган вақтда гол ур. Агар фол ишлатишса, йиқил. Агар майдонда ётиб вақт чўзишга тўғри келса, иккиланмасдан шундай қил ва ғалаба қозон. Аслида ҳамма шундай қилади», — дея ёзган Ривалдо.

Собиқ футболчи Неймарнинг танқидчиларини уни кўра олмасликда айблаган. У симульяция учун футболчини айблаб бўлмаслиги, чунки ҳакамлар футболчиларни қўполликлардан ҳимоя қилишмаётганини таъкидлаб ўтган.

Шунингдек, бразилиялик яна бир собиқ футболчи Роналдо Неймарнинг ёнини олиб чиққан. 

«Неймар ҳақида билдирилаётган ҳамма фикрларга ҳам қўшилмайман. У – фикрлаш доираси кенг футболчи. Турли тўқнашувлардан ўзини четга олишга уриняпти, бироқ ҳакамлар уни етарлича ҳимоя қилишаётгани йўқ. Агар менга ҳам тўхтовсиз қўполлик қилаверишса, ўзимга нисбатан адолатсизлик бўлаётганини ҳис қилган бўлардим. Неймарни танқид қилиш – бемаънилик. ТВ-шоулар ва газеталар шунчаки ўзидаги бўшлиқни тўлдиришга уриняпти, холос», - деган Роналдодан иқтибос келтирди Sky Sports.

Бундан олдинроқ Дания терма жамоаси дарвозабони Петер Шмейхель, франциялик собиқ футболчи Эрик Кантона, германиялик собиқ футболчи Лотер Матеус, Мексика термаси сардори Рафа Маркес ва бошқалар Неймарни майдондаги артистона ҳаракатлари учун кескин танқид қилишганди.

Маълумот учун, RTS Sport портали Бразилия терма жамоаси юлдузи Неймар жаҳон чемпионати доирасидаги тўртта ўйин давомида 14 дақиқага яқин вақтини майдонда ётиб ўтказганини ҳисоблаб чиқди.

Жаҳон чемпионати бошланганидан буён энг кўп қўполлик айнан унга нисбатан ишлатилган – 23 марта. Қўполликлардан сўнг майдонга қулаган Неймар жами 13 дақиқаю 50 сония давомида чим устида ётган. Энг узун «танаффус» эса Мексикага қарши ўйинда бўлган – беш ярим дақиқа.

6 июль куни Бразилия терма жамоаси чорак финалда Бельгия термасига қарши майдонга тушади. Ўйин Қозон шаҳрида бўлиб ўтади.