Тошкентда «Бунёдкор» шоҳ кўчасининг бир қисми ёпилди

Тошкент шаҳрида 6 июлдан бошлаб «Бунёдкор» шоҳ кўчасининг Муқимий кўчасидан Кичик ҳалқа йўлигача (метронинг «Чилонзор» бекати) бўлган қисми транспорт қатнови учун ёпилади. Бу ҳақда ИИББ ахборот-мультимедиа маркази маълум қилган.

«2018 йил 6 июлдан Бунёдкор кўчасининг Муқимий кўчасидан то Кичик ҳалқа йўлигача бўлган қисмида («Чилонзор» метро бекати) қурилиш ишлари олиб борилаётгани муносабати билан транспорт воситаларининг ҳаракати чекланишини маълум қиламиз. Вақтинча юзага келган ноқулайлик учун узр сўраймиз», дейилган хабарда.

Мазкур йўл ўтказгич қурилиши ўтган йилнинг кузида бошланганди. «Ўзбекистон темир йўллари» аввалига кўприк 2018 йилнинг май ойида, кейинроқ июнда очилишини маълум қилганди.

Эндиликда эса қурилиш ишлари ёз фасли охиригача якунланиши айтилмоқда. 

«Бунёдкор» шоҳ кўчаси Тошкент шаҳрининг энг узун, жанубий ва шимолий қисмларини боғлайдиган йўлдир. Мазкур йўналишда доим автомобиллар қатнови тирбанд. Ушбу магистралда жами 9та йўл ўтказгич мавжуд бўлиб, энди уларнинг сони яна биттага кўпаяди.

Ушбу йўл ўтказгич узунлиги 667,5 метр бўлиб, йирик иншоот 8 метр баландликдаги 23та устун оралиғида барпо этилмоқда.

Бунёд этилаётган иншоот 6та йўлакдан иборат. Замонавий йўл ўтказгич эстакада қисмининг узунлиги 488,5 метр бўлиб, баландлиги 8, кенглиги эса 24,5 метрни ташкил этади.

Умумий узунлиги 124 метр бўлган иккита пиёдалар ўтиш кўприги қурилади. Янги бунёд этилаётган йўл ўтказгичнинг ёритиш тизими ҳам жаҳон андозаларига мос равишда барпо этилиши кўзда тутилган.