Хива вокзали ёнида ерости йўл ўтказгичи барпо этилади

Хивада темирйўл вокзали ёнидан узунлиги 450 метр бўлган ерости йўл ўтказгичи қурилади. Лойиҳа шаҳарни шимолий ва жанубий қисмларга ажратиб қўйган аллея ноқулайликларини бартараф этиш мақсадида ишлаб чиқилган.

Фото: Ўзбекистон темир йўллари

Хива темирйўл вокзали яқинида 450 метр узунликдаги ерости йўл ўтказгичи қурилади. Бу ҳақда президентга тақдим этилган лойиҳалар тақдимотида сўз борди.

Бу йўл «транспортлар қатновини алоҳида ташкил этиш имконини беради, вокзал ва «Ичан қалъа» ўртасида пиёдалар хавфсиз ҳаракатланади».

Транспорт вазирлиги ҳузуридаги Автомобил йўллари қўмитаси раиси Жамшид Турсунов вокзал яқинидаги хиёбонни сақлаб қолган ҳолда янги йўл қурилишини маълум қилди.

«Хива шаҳрида илгари қурилган замонавий темирйўл вокзал ёнида катта аллея барпо этилган эди. Бунинг натижасида шаҳарнинг шимолий ва жанубий қисмлари ажралиб қолганди. [Президент] транспорт воситаларида ҳаракатланувчи аҳолига қулайлик яратишни таъминлаш ҳамда шаҳар икки қисмга ажралиб қолганининг ҳисобига юзага келган ноқулайликларни бартараф этиш бўйича топшириқ бергандилар. Бугун шаҳар вокзал олдида барпо этилган, Хиванинг қадимий қалъалари билан боғланиб кетган аллеяни сақлаб қолган ҳолда ерости йўли қуриш бўйича тақдимотимизни маъқулладилар», — деди у.

Унинг сўзларига кўра, давлат раҳбари ушбу лойиҳани 2025 йилдан бошлаш бўйича топшириқ берган.

Бу ерости йўли маданий мерос объектларига умуман зарар етказмайди. Йўлнинг узунлиги 450 метр — 50 метри ёпиқ, 400 метри очиқ галерея шаклида қурилади.

#Хива #йўл ўтказгич