Ўзбекистон Европа Фармакопея комиссияси илмий ишида фаол иштирок этади 

Страсбург шаҳридаги 160-сессияда Ўзбекистонга Европа дори воситалари ва соғлиқни сақлаш сифати директорати (EDQM) кузатувчиси мақомининг берилиши мамлакат фармацевтика соҳаси учун муҳим воқеа бўлди. 

Фармацевтика соҳасини ривожлантириш агентлиги делегацияси 2018 йилнинг 19-20 июнь кунлари бўлиб ўтган 161-сессияда иштирок этди. Сессияда 10 янги монография, 1 янги боб қабул қилинди, 92 монография ва 7 бўлим қайта кўриб чиқилди, шунингдек янги матнлар киритилди, дея хабар беради KUN.UZ манбаси.

Таъкидлаш жоизки, кузатувчи-мамлакат мақоми Ўзбекистонга Европа Фармакопея комиссияси илмий иши ҳамда EDQM'нинг бошқа тадбирларида иштирок этиш имконини беради. 

Шунингдек Ўзбекистонга дори воситалари ва фаол фармацевтик ингридиентлар сифатини назорат қилиш учун монографияларга, тадқиқотлар учун зарур бўлган ахборот материаллари, монография ишлаб чиқиш учун техник қўлланмалар, ишлаб чиқариш ёки қайта кўриб чиқиш жараёнида бўлган монография лойиҳаларига оид маълумотларга бепул онлайн кириш имкони тақдим этилди. 

Юқорида қайд этилганлар билан бир қаторда Ўзбекистон Республикаси Давлат Фармокопеясини ишлаб чиқишда Европа Фармокопеяси монографияларидан фойдаланиш ҳуқуқининг тақдим этилиши тўғрисидаги меморандумни имзолаш масаласи кўриб чиқилмоқда. Бу дори воситаларининг сифати ва хавфсизлигига нисбатан белгиланадиган давлат стандартлари ва қоидаларини ишлаб чиқишда Европа стандартларидан фойдаланиш имконини беради.