«Барса» мухлислари учун сюрприз. Яна бир бразил Каталонияда

«Барселона» айёроналик билан яна бир драматик трансферни амалга оширди: 41 миллион евро (+1 миллион евролик бонуслар) эвазига «Бордо»нинг ҳужумкор ярим ҳимоячиси Малком трансфер қилинди.

«Рома» ўрнига «Барса»га

Душанба куни кечқурун бу футболчи Римга учиши керак эди: французлар клуби уни «Рома»га сотишга розилик берган, томонлар футболчи трансфери ҳақида расман маълум қилганди ҳам. Душанба куни кечқурун римлик мухлислар аэропортга чиқишган, футболчи Римга келиб тиббий кўрикдан ўтиши кутилганди. Аммо бир неча соат ичида вазият тубдан ўзгариб кетди ва «Бордо» раҳбарлари ваъдаларидан тониб, 21 ёшли футболчини қимматроқ нархга каттароқ клубга сотди.

Гап шундаки, «Барселона» «Челси»дан Виллианни трансфер қила олмагач, захира вариантга қайтганди. «Рома» Малком учун 36 миллион евро таклиф қилаётганди, «Барселона» эса «Челси» Виллиан учун 80 миллион евро талаб қилгач, икки баробар арзонроққа бошқа бир бразилияликни сотиб олишга қарор қилди.

Каталониялик мухлислар учун бу ҳақиқий сюрприз бўлди. 21 ёшли футболчи энди «Барселона» билан 5 йиллик шартномага имзо чекади. 

Малком ким ўзи?

Малком – «Бордо»нинг ўнг қанотида ҳаракатланган бразилиялик форвард. У Лига 1 турнирининг ўтган мавсумида 32 ўйин ўтказиб, 10 гол урган ва 7 ассистга муаллифлик қилган.

У профессионал фаолиятини «Коринтианс»да бошлаган, жамоа тажрибали вингерини Қатарга йўллаб, 17 ёшли футболчига ишонч билдирганди. 2016 йилда уни сал қолса Украинага,  жўнатиб юборишарди, аммо «Динамо» ва «Шахтёр» клубларига рад жавоби берилиб, «Бордо»нинг 5 миллион евролик таклифи қабул қилинганди.

«Коринтианс» ёки Европа: Қийин танлов тарихи

Малком 17 ёшида Бразилияда «Коринтианс»нинг асосий таркибига кирганди, у илк мавсумидаёқ жамоаси билан мамлакат чемпиони бўлди. Ўшанда «Коринтианс»ни Тите бошқарган, у Малкомга катта ишонч билдирган, уни кейинги мавсумларда жамоасининг асосий етакчисига айлантиришни мўлжаллаганди.

Айнан шу вақтда футболчига Европадан яхши таклифлар кела бошлайди. Ёш футболчи дилемма қаршисида қолади: қолиш ва болалигидан буён мухлислик қилган жамоаси сафида Либертадорес кубогида иштирок этиш ёки молиявий қулай шартномага эга бўлиб океан ортига йўл олиш.

«Тите менга шундай деганди: «Бу ерда сен янада ўсишинг, менинг ва мухлислар ишончида бўлишинг мумкин. Бу ерда совринлар ютасан. Сен яна бир ёки икки йил шу ерда қолишинг керак, кейин Европани лол қолдиришни бошлашинг мумкин», дея эслайди Малком ESPN Brasil нашрига берган интервьюсида.

Футболчи танлов борасида узоқ ўйлайди. У 18 ёшида Франциядаги ҳаётга мослаша олмаслиги мумкинлигидан хавотирланади. Янаям аниқроғи, фаолиятини хавф остида қолдиришдан чўчийди.

Шундан сўнг у Тите билан яна бир бор гаплашиб олади. У мураббийга шундай дейди: «Профессор, бу ҳаётимдаги ягона имконият бўлиши мумкин, ҳозир мен жуда яхши спорт формасидаман. Ҳаммага ҳам иккинчи имкон берилмайди. Европадан бошқа таклиф келмаслиги мумкин. Ҳозир мен яхши ўйнаяпман, бир йилдан кейин бундай бўлмаслиги мумкин. Муаммолар пайдо бўлса, мени осонгина унутиб юборишади».

Малком бор кучи билан оиласини қашшоқликдан қутқариш учун тиришарди. У Европадан келадиган ҳар қандай таклиф оиласини камбағалликдан қутқаришини яхши англарди.

Буни Тите ҳам тўғри тушунади. Лекин у яна бир бор Малкомни қолдиришга кўндирмоқчи бўлади.

«Тите йиғлаб юборди. У деди: «Мен сенга қаттиқ боғланиб қолгандим, сенинг оилангни, қаерданлигингни биламан. Энди сенга мухлислик қиламан. Омад ёр бўлсин».

«Бавария» орзуси

2018 йил мартида Малком Мюнхен клубида ўйнашни исташини маълум қилди.

«Менимча вақти келди, – деганди футболчи Sky Deutschland мухбирига берган интервьюсида. – Мен «Бордо»да яхши дамларни ўтказдим ва бунинг учун миннатдор бўлишим керак, аммо ҳозир менга янги чақириқлар ва янги мақсадлар керак.

«Бавария» – дунёнинг энг йирик клубларидан бири. Кунлардан бир куни у ерда бўлиш – орзу. Барча Мюнхеннинг «Бавария»сини билади», – деганди Малком.

Аммо май ойида уни осмондан ерга тушириб қўйишди. Юпп Хайнкес журналистларга, Германия чемпиони бу футболчига қизиқиш билдирмаётганини маълум қилди. «Бордо» президенти  Стефан Мартин Малкомни қўллаб-қувватлади: «Бавария»нинг бу жавоби кўп нарсани англатмайди. Футболчига бундай муносабатда бўлиш тўғри эмас. Малком «Бавария»га ўтишни орзу қилишга ҳақли».

Кейинроқ футболчига кўплаб жамоалардан таклифлар бўлди. Клуб февралдаёқ футболчини сотишини маълум қилганди. Аввалига «Арсенал», «Интер» ва «Эвертон» футболчига даъвогарлик қилди, кейин «Рома» катта саҳнага чиқди, алалоқибат футболчини «Барселона» илиб кетди.

Уч йил ўтиб Малком ўшанда ҳаётидаги энг тўғри қарорни қабул қилгани аён бўлмоқда. У энди «Барселона»да. Балки у яна Тите қўл остида ўйнаши мумкин. Бу сафар Бразилия терма жамоаси сафида.