Афғонистонда сайлов комиссиясига 57 млн доллар ажратилди

Афғонистонда парламент ва вилоят маслаҳатчилари сайлови учун яна қўшимча 57 млн АҚШ доллари ажратилади. Бу ҳақида БМТнинг Афғонистондаги ваколатхонаси матбуот хизмати хабар қилди.

Мустақил сайлов комиссияси ҳамда сайловлардаги адолатсизликлар билан шуғулланувчи Комиссия вакиллари адолатли фаолият юритишлари тўғрисида ҳамкорлик келишувини имзолашди.

«Ушбу битим сайлов фаолияти шаффофлигини таъминлашда жуда муҳимдир. БМТга аъзо давлатлар сайловга тайёргарлик кўришда халқаро ҳамкорлик қилишга ваъда беришди», деди БМТнинг Афғонистондаги ваколатхонаси бош котиби вакили Тадамичи Ямомото.

Олдин хабар қилинганидек, парламент сайловлари 20 октябрь куни ўтказилиши белгиланган.

Овоз беришда қатнашиш учун мамлакат фуқаролари рўйхатдан ўтиб, сайлов гувоҳномасини олишлари керак. Рўйхатдан ўтиш муддати 14 апрелдан 3 августгача деб белгиланган. Ҳозирги пайтда 8,9 миллион фуқаро рўйхатдан ўтди. Уларнинг 3 миллиондан ортиқроғини аёллар ташкил қилади.